Хөлөг онгоцноосоо унасан далайчин Номхон далайд далайн хаягдал дээр 14 цаг тэссэний эцэст аврагдсан байна.

Өдгөө 52 настай далайчин Вадим Перевертилов хоёрдугаар сарын 16-ны өглөө хантаазгүй ус руу унажээ. Тэрбээр хамгийн ойрхон харагдах хэдэн километрийн цаана орших хогийн “хар цэг” рүү зүтгэсэн нь түүнийг аврахад тусалсан байна. Ийнхүү 14 цагийн дараа хөлөг онгоц буцаж ирснээр тэрбээр аврагджээ. Түүний хүү Марат “Аав маань их туйлдсан, 20 насаар хөгшин харагдаж байсан” гэв.

Хоёрдугаар сарын 16-ны ээлж солигдсон өглөө тэрбээр толгой нь эргээд байсан тул тавцан руу гарснаар ийм явдал болсон байна. Харин хөлөг онгоц хүн унасныг мэдэлгүй цааш хөдөлжээ. Түүнийг унаснаас зургаан цагийн дараа хөлгийн ахмад анзааран онгоцоо эргүүлжээ. Харин энэ талаар Вадим “Харанхуйд харагдах хар цэгийг даган сэлсээр очиход далайн хог хаягдал байсан" хэмээн ярьсан байна.