Олимпийн аварга, МҮОХ-ны ерөнхийлөгч Н.Түвшинбаяр өөрийн сайн найз Э.Энхбат начныг зодож, биед хүнд гэмтэл учруулсан. Энэ хэрэгт Н.Түвшинбаярыг сэжигтнээр татан, өчигдөр баривчилсан бөгөөд  ШШГЕГ-ын харъяа 461 дүгээр саатуулаад байсан юм. Тэгвэл Н.Түвшинбаярт холбогдох хэргийн анхан шатны шүүх хурал өнөөдөр болж, түүнд энэ сарын 25 хүртэл цагдан хорих ял шийтгэл оноохоор шийдвэрлэсэн талаар Баянгол, Хан-Уул, Сонгинохайрхан дүүргийн Эрүүгийн хэргийн анхан шатны шүүхийн Тамгын газраас мэдээллээ.

Тодруулбал, Хан-Уул дүүргийн Эрүүгийн хэргийн анхан шатны шүүх тус дүүргийн прокурорын газраас ирүүлсэн эрүүгийн 0275 дугаартай, Н.Түвшинбаярыг яллагдагчаар цагдан хорих таслан сэргийлэх арга хэмжээ авахуулах тухай саналыг 2021 оны дөрөвдүгээр сарын 5-ны өдөр хүлээн авч, мөн өдөр хянан хэлэлцсэн байна. Уг шүүх хуралдаанд Хан-Уул дүүргийн прокурорын газрын хяналтын прокурор болон яллагдагчийн өмгөөлөгч Л.Данзанноров нар оролцжээ.

Яллагдагч Н.Түвшинбаярыг 2021 оны дөрөвдүгээр сарын 2-нд согтууруулах ундааны зүйл хэрэглэсэн үедээ хохирогч Э.Энхбатыг тодорхойгүй шалтгаанаар зодож, түүний биед гавлын ясны үргэлжилсэн хугарал бүхий хүнд гэмтэл санаатай учруулсан үйлдэлд Эрүүгийн хуулийн тусгай ангийн 11.1 дүгээр зүйлийн 1 дэх хэсэгт зааснаар эрүүгийн хэрэг үүсгэж, яллагдагчаар татан мөрдөн байцаалтын ажиллагаа явагдаж байна.

Н.Түвшинбаярт Эрүүгийн хэрэг хянан шийдвэрлэх тухай хуулийн 14.9 дүгээр зүйлийн 1 дэх хэсгийн 1.2 дахь заалтад зааснаар цагдан хорих таслан сэргийлэх арга хэмжээ авах нь зүйтэй гэж шүүх үзээд 2021 оны дөрөвдүгээр сарын 5-ны өдрөөс мөн оны дөрөвдүгээр сарын 25-ны өдрийг хүртэл Шүүхийн шийдвэр гүйцэтгэх ерөнхий газрын харьяа 461 дүгээр хорих ангид цагдан хорихоор шийдвэрлэжээ.