Монгол улсын өсөх идэр начин Э.Энхбатыг түүний сайн найз Олимпийн аварга, МОҮХ-ны ерөнхийлөгч Н.Түвшинбаяр зодож, хүнд гэмтэл учруулсан хэрэг энэ сарын 2-нд гарсан. Одоогийн байдлаар Э.Энхбат начин ГССҮТ-ийн сэхээн амьдруулах тасагт унтуулга хийлгэсэн байдалтай байгаа билээ. Харин уг хэрэгт сэжигтнээр татагдаад буй Н.Түвшинбаяр өчигдөр баривчлагдаж, хорих 461 дүгээр ангид саатуулагдаад байна.

Энэ талаар ЦЕГ-ын Хэвлэл мэдээллийн төвийн дарга Б.Баатархүү мэдээлэл өглөө. Тэрбээр “Дөрөвдүгээр сарын 2-ны өдөр 21:29 цагт Хан-Уул дүүргийн I хорооны нутаг дэвсгэрт хүн зодолдоод байна гэх дуудлага цагдаагийн байгууллагад ирсэн. Үүний дагуу тус дүүрэг дэх Цагдаагийн газрын I хэлтсийн алба хаагчид хэргийн газарт очиж ажилласан. Холбогдох гэрчүүдээс тайлбар мэдүүлэг авсан байгаа. Хохирогч болох Э.Энхбат начин ГССҮТ-д хэвтэн эмчлүүлж байна.

Уг хэрэгт холбогдуулан сэжигтэн Н.Түвшинбаяраас өмгөөлөгч байлцуулан тайлбар мэдүүлэг авсан. Түүний биеийн байдлаас хамаарч эмчлүүлэх хүсэлт гаргасан. Цагдаагийн байгууллагаас энэ хүсэлтийг хангаж өгсөн. Гэхдээ энэ хэрэгт холбогдуулан Н.Түвшинбаярыг хойшлуулашгүйгээр баривчлан, хорих 461 дүгээр ангид хүргэсэн. Эрүүгийн хуулийн 11.1-т зааснаар эрүүгийн хэрэг үүсгэж яллагдагчаар татах саналаа Хан-Уул дүүргийн Цагдаагийн I хэлтсээс прокурорт хүргүүлсэн байгаа. Хүний эрүүл мэндэд санаатайгаар хүнд гэмтэл учруулах гэдэг зүйл ангиллаар цааш мөрдөн шалгах ажиллагаа үргэлжилнэ” гэв.