Монгол, Оросын хамтарсан “Монголросцветмет” компанийн захирал До.Ганболдыг албан тушаалаа урвуулан ашигласан хэргээр АТГ 2017 оноос хойш шалгаж эхэлсэн. Түүнд холбогдох хэргийн мөрдөн байцаалтын ажиллагаа дуусаж, өнгөрсөн оны аравдугаар сард прокурорт яллах саналтайгаар шилжүүлээд байсан юм. Харин прокуророос хэргийг хэрэгсэхгүй болгож, хаах шийдвэр гарчээ.

Хэргийг эргэн сануулбал, До.Ганболд “Монголросцветмет” компанийн захирлаар ажиллаж байхдаа гаднын аж ахуйн нэгж, байгууллагад жонш, хүдрийн баяжмалыг зах зээлийн үнээс бага үнээр нийлүүлсэн. Зарим компанид илт давуу байдал олгосон, үндэслэлгүйгээр хөрөнгөжсөн зэрэг хэргээр шалгагдсан юм. Шалгалтын явцад өөрийн болон гэр бүлийнхээ гишүүдийн дансаар их хэмжээний валютын гүйлгээ хийсэн нь илэрсэн гэх мэдээлэл ч бий. Үндэсний аудитын газар 2017 оны гуравдугаар сард “Монголросцветмет” компанид аудитын шалгалт хийж, 78 тэрбум төгрөгийн зөрчил илрүүлснээр түүнийг АТГ шалгаж, прокурорт шилжүүлээд байсан юм.