Хэнтий аймгийн Хэрлэн сумын IV багийн иргэн П.Б нь өнгөрсөн арванхоёрдугаар сарын 27-ны өдөр тус аймгийн Өмнөдэлгэр сумын II багийн нутаг дэвсгэрт “Приус-20” маркийн автомашинаа зам дагуу үлдээжээ. Тэрбээр машин нь эвдэрсэн тул сэлбэг авахаар зэргэлдээх сум руу явсан байна.

Иргэн Б дөрөв хоногийн дараа машинаа авахаар иртэл гэмт этгээдүүд автомашиных нь эд ангийг тоносон байсан аж. Тэрбээр цагдаагийн байгууллагад дуудлага өгснөөр албаныхан хэргийн газарт үзлэг хийсэн байна. Хэнтий аймгийн Цагдаагийн газрын алба хаагчид эл хэргийг үйлдсэн Өмнөдэлгэр сумын VI багийн харьяат иргэн Б.Б, Э.М нарыг  48 цагийн дотор илрүүлэн, шалгаж байна. Гэмт хэрэг үйлдсэн этгээдүүд уг тээврийн хэрэгслийн иж бүрэн батарей, аккумлятор,  обудтай гурван дугуйг хулгайлсан байсан гэнэ.