Өнгөрсөн амралтын өдрүүдэд Тээврийн цагдаагийн албаны жижүүрийн шуурхай удирдлагын хэлтэст нийт 250 дуудлага мэдээлэл иржээ. Үүнээс зам тээврийн ослын шинжтэй 198 дуудлага мэдээллийг хүлээн авч шийдвэрлэн ажилласан байна.  Бүртгэгдсэн зам тээврийн ослын улмаас нэг  хүн гэмтэж, ноцтой зам тээврийн ослын улмаас орон нутагт нэг хүний амь нас хохирсон байна.

Тодруулбал, арванхоёрдугаар сарын 5-нд 12:00 цагийн орчимд Өмнөговь аймгийн Гурвантэс сумын  тавдугаар багийн нутаг дэвсгэр Шар толгой гэх газар асфальтан замд North Benz маркийн ачааны автомашин Howo маркийн ачааны автомашинтай мөргөлдөж, Howo маркийн автомашины жолооч 20 настай, эрэгтэй Г-гийн амь нас хохирсон байна. Тухайн  хэргийг шалгаж байгаа аж. Мөн алба хаагчдаас хийсэн хяналт шалгалтын үеэр нийслэлд согтуугаар тээврийн хэрэгсэл жолоодсон 17 жолооч, орон нутагт найман жолоочийг тус бүр илрүүлж хуулийн дагуу хариуцлага тооцсон байна. 

Замын хөдөлгөөнд оролцогч жолооч нар тээврийн хэрэгслийнхээ дугуйг зориулалтын өвлийн дугуйгаар солих, хурдыг зөвшөөрөгдсөн хэмжээнээс 20-30 хувиар бууруулж зорчихыг Тээврийн цагдаагийн албанаас анхааруулж байна.