Цагдаагийн байгууллагад энэ сарын 22-ны шөнө нийслэлийн Баянгол дүүргийн наймдугаар хорооны нутаг дэвсгэрт байрлах “Байрны гадна зогсоолд байрлуулсан 27 тооны тээврийн хэрэгсэлд халдан, эд зүйл хулгайлсан байна” гэх дуудлага, мэдээлэл ирсэн байна. Мэдээллийн дагуу тус дүүргийн цагдаагийн газрын хоёрдугаар хэлтсийн Эрүүгийн цагдаагийн тасгийн алба хаагчид мөрдөн шалгах, эрэн сурвалжлах ажиллагаа зохион байгуулж, 18 настай, эрэгтэй Б нь 16-30 насны О, Б нартай бүлэглэн үйлдсэнийг тогтоож, баривчилжээ. Одоогоор мөрдөн шалгах ажиллагаа үргэлжилж байгаа юм байна.

Иймд иргэд та бүхэн энэ төрлийн гэмт хэрэгт хохирохоос урьдчилан сэргийлж сэжигтэй үйлдэл, этгээдийн талаарх мэдээллийг цагдаагийн байгууллагын 102 тусгай дугаарт цаг алдалгүй мэдээлэхийг цагдаагийн байгууллагаас зөвлөж байна.