ТӨБЗГ-ын дарга Б.Цэнгэл өчигдөр "Цемент шохой" ТӨХК-ийн гүйцэтгэх захирал Л.Наранбаатар болон тус компанийг ТУЗ-ийн гишүүдийг албан тушаалаас нь чөлөөлөхөөр болсноо зарласан. Тэгвэл үргэлжлүүлэн өнөөдөр хууль хяналтын байгууллагын мөрдөгчид Л.Наранбаатарын түрээсэлдэг орон сууц, "Цемент шохой" ТӨХК-ийн оффис дахь албан өрөөнд нь нэгжлэг хийж байгаа аж.

     Эх сурвалжийн мэдээлснээр, "Цемент шохой" ТӨХК-ийн гүйцэтгэх захирал Л.Наранбаатарыг эрх мэдэл, албан тушаалын байдлаа урвуулан ашиглаж, өөртөө давуу байдал олгож, улсад их хэмжээний хохирол учруулж, төсвийн хөрөнгийг зориулалтын бусаар зарцуулсан үндэслэлээр ийнхүү шалгаж эхэлжээ. Тухайлбал, Л.Наранбаатар Дархан хотод төсвийн мөнгөөр үнэтэй байр түрээсэлсэн, ханган нийлүүлэгч компаниас 20 сая төгрөгийн хахууль авсан байж болзошгүй гэх мэт авлига, албан тушаалын гэмт хэргийн сэжүүрүүд илэрсэн аж. 

Л.Наранбаатарыг өнгөрсөн оны гуравдугаар сард "Цемент шохой" ТӨХК-ийн гүйцэтгэх захирлын албан тушаалд томилсон. Өнгөрсөн жилийн хугацаанд Л.Наранбаатар архидан согтуурсан, ажил цалгардуулсан, барилгын оргил үед төлөвлөгөөт засвар нэрээр цементийн үйлдвэрлэлийг зогсоож ачаалал үүсгэсэн зэргээр хэл ам багагүй таталсан. Улмаар Үндэсний аудитын газраас "Цемент шохой" ТӨХК-д аудитын шалгалт хийж, өнгөрөгч долоо хоногт сөрөг дүгнэлтээ танилцуулснаар Л.Наранбаатарыг огцруулах эсэх асуудал яригдаж эхэлсэн. Тодруулбал, Аудитын газраас Цемент шохой" ТӨХК-ийн гүйцэтгэх захирал Л.Наранбаатары хувийн зардалдаа 6.4 сая төгрөг, уул тахих болон бумбын тахилгад 5.9 сая төгрөг гэх зэргээр үйлдвэрийн мөнгийг үр ашиггүй зарцуулсан гэж дүгнэсэн. Улмаар ТӨБЗГ-аас Ажлын хэсэг байгуулагдаж, тус газрын дарга Б.Цэнгэл "Цемент шохой" ТӨХК-д биечлэн очиж, тус компанийг ТУЗ-ийн гишүүдийг чөлөөлж буйгаа зарласан юм.