Г.МӨНХСАЙХАНЫГ УУХҮ-ИЙН САЙД Ж.ГАНБААТАРЫН ДОТНЫН НАЙЗ ГЭХ

     Ашигт малтмал газрын тосны газрынхан энэ сарын 4-нд Горхи Тэрэлжийн байгалийн цогцолбор газрын Баянгол хүүхдийн зусланд цасны баяр тэмдэглэжээ. Энэ үеэр Төрийн захиргаа удирдлагын газрын дарга Г.Мөнхсайхан согтуурч, ажилтнаа зодож, Баянгол хүүхдийн зуслангийн эд хөрөнгийг эвдэж, сүйтгэсэн гэх мэдээлэл олон нийтийн сүлжээгээр цацагдсан. Энэ талаар эх сурвалжаас тодруулахад “Төрийн захиргаа удирдлагын газарт компьютер, программын алба байдаг. Г.Мөнхсайхан дарга тус албанд ажилд ороод сар ч болоогүй ажилтнаа зодсон гэх мэдээлэл бий. Тэд энэ сарын 4-ны 08:00 цагийн үед Улаанбаатараас хөдөлж, “Тэрэлж стар ресорт”ын хажуу талын амралтын газар очсон юм билээ. Тэгээд оройдоо асуудал үүссэн учир тарцгаасан гэсэн. Бүх ажилчдыг цасны баярт явахыг шаардаагүй учир зарим нь яваагүй. Тиймээс Г.Мөнхсайхан дарга бусдын биед ямар хэмжээний хохирол учруулсан болохыг мэдэхгүй байна” гэв.

    Ажилтнаа зодож, бэртээсэн байж болзошгүй АМГТГ-ын Төрийн захиргаа, удирдлагын газрын дарга Г.Мөнхсайхан Баянгол дүүргийн Иргэдийн төлөөлөгчийн албыг давхар хашдаг болохыг эх сурвалж онцолсон юм. Мөн түүнийг УУХҮ-ийн сайд Ж.Ганбаатар, Баянгол дүүргийн Засаг дарга Ө.Сумъяабазар нарын дотнын найз гэх. Учир нь тэднийг  бие биеийнхээ хийсэн хэргийг эрх мэдэл, албан тушаалын байдлаа урвуулан ашиглаж байгаад хаацайлж сурсан хэмээдэг.

Г.МӨНХСАЙХАН: ЦАСНЫ БАЯРТ ЯВЖ, БУСДЫГ ЗОДООГҮЙ УЧИР НАМАЙГ ГҮТГЭСЭН ХҮМҮҮСИЙГ ХУУЛИЙН БАЙГУУЛЛАГАД ӨГНӨ

      Дээрх хэргийн талаар Төрийн захиргаа удирдлагын газрын дарга Г.Мөнхсайханаас тодруулсан юм. Тэрбээр “Манай байгууллагынхан энэ сарын 4-нд ажилчдаа хүлээн авах, цасны баяр тэмдэглэх зэрэг олон нийтийг хамарсан үйл ажиллагаа зохион байгуулаагүй.  Тиймээс би бусдыг зодож, гэмтээгээгүй гэсэн үг. Өмнө нь ч ийм асуудал гарч байгаагүй. Намайг зохион байгуулалттай гүтгэж байгаа учир хуулийн байгууллагад хандаж, гомдол гаргана” гэв. Тэрбээр 2022 онд АМГТГ-ын Төрийн захиргаа удирдлагын газрын даргаар томилогдсон байна.

АМГТГ-ЫН ЦАСНЫ БАЯРТ “НИКИТОН”-Ы  Б.БАТЧУЛУУН, ХӨТЛӨГЧ Э.ЦОЛМОНБАЯР ТЭРГҮҮТЭЙ УРЛАГИЙНХАН ОЧЖЭЭ

     Харин АМГТГ-т ажилладаг эх сурвалжийн өгсөн мэдээллээр АМГТГ-ын хамт олон цасны баяр зохион байгуулж, үнэтэй хамтлаг, дуучид, хөтлөгч авчирч баяраа тэмдэглэсэн байна. Тодруулбал, тэдний баяр дээр “Никитон” хамтлагийн дуучин Баачка, хөтлөгч Цоомоо нар очсон гэдгийг эх сурвалж мэдээлсэн юм. Төрийн албаны ёс зүй, хэмнэлтийн горим АМГТГ-ын дарга нарт үйлчилдэггүй гэх.