Ховд аймгийн Жаргалант сумын Наран багт амьдардаг байсан 15 настай охин бусдын гарт амиа алдсан байж болзошгүй  хэрэг нэгдүгээр сарын 28-нд гарсан. Хэргийн талаар талийгаачийн ар гэрийнхэн мэдээлэл хийлээ.

    Энэ үеэр талийгаачийн нагац эгч “Дүү минь нэгдүгээр сарын 12-нд ээжтэйгээ уулзана хэмээн гэрээсээ гараад хоёрдугаар сургуулийн ойролцоо дөрвөн охинд зодуулсан юм билээ. Талийгаач бусдад зодуулсан тухайгаа ээжээсээ нууж байсан. Харин үеэл найздаа хэлэхдээ “Би дөрвөн охинд зодуулсан. Тархи хагарсан учир таксинд суутал ухаан алдчихсан байсан. Тэгээд сэртэл танихгүй ах нартай хамт байсан. Гаднаас хоёр эгч орж ирээд "Хоол ид, хоночихоод яв гэсэн". Тэгэхээр нь би гараад ирсэн" гэж ярьсан байна лээ. Тэгээд би эмнэлэгт очиж дүүгийнхээ толгойг оёулсан. Тэр цагаас хойш дүү минь босох тэнхэлгүй болж, өдөржин, шөнөжин уйлдаг болсон. Тэгээд өвчнөө дийлэхгүй нэгдүгээр сарын 28-нд бурхан болсон. Дүүг минь бурхан болохоос өмнө “Од тэнгэр”, “Хулан” гэх хаягаас “Танай хоёр дүү надад гай болоод байна. Хэн нь эмнэлгийн орон дээр байхыг хараарай. Удахгүй гоё юм болно" гэх мэт заналхийлсэн чат ирдэг байсан. Мөн паркийн А, Б байрны нэгдүгээр орцны нэг давхрын хоёр тоотод хүрээд ир. Хаалга онгорхой байгаа” гэж намайг гэртээ дуудсан. Тухайн үед би Улаанбаатар хотод байсан учир түүнийгээ хэлж,  дүү нарынхаа өмнөөс уучлалт гуйсан. Тэгээд дүү нарыгаа гэрээсээ гарч болохгүй шүү гэж сануулсан. Дүүг минь зодсон хүүхдүүдийн нэг нь махлаг, бүдүүн хүүхэд байсан гэсэн. Би амьдралд дөнгөж хөл тавьж буй 15-хан настай дүүгээ алдсандаа харамсаж байна” гэлээ.