Холбогдогч болох 18 настай С.Г нь 16 настай төрсөн дүүгийнхээ амь насыг хэрцгийгээр хөнөөсөн болохыг цагдаагийн байгууллагынхан илрүүлсэн байна. Энэ талаарх тодорхой мэдээллийг ЦЕГ-ын Хэвлэл мэдээллийн ахлах мэргэжилтэн, Цагдаагийн ахмад М.Мөнхшүрээс тодрууллаа.

-Талийгаач охины цогцос олдсон талаарх дуудлага цагдаагийн байгууллагад хэзээ ирсэн бэ?

-Цагдаагийн байгууллагын 102 утсанд "Сүхбаатар дүүргийн нутаг дэвсгэрт өчигдөр 21:45 цагт эмэгтэй хүний цогцос байна" гэдэг дуудлага, мэдээлэл ирсэн. Тус дуудлага, мэдээллийн мөрөөр харьяа дүүргийн цагдаагийн хэлтэс буюу Сүхбаатар дүүргийн цагдаагийн газрын II хэлтэс, Эрүүгийн цагдаагийн албаны гэмт хэрэгтэй тэмцэх хэлтэс, Нийслэлийн цагдаагийн удирдах газрын хүнд гэмт хэрэгтэй тэмцэх хэлтэс, Мөрдөн байцаах албаны хүнд гэмт хэрэгтэй тэмцэх хэлтсийнхэн хэргийн газар дээр нь очиж ажилласан. Хэргийн газраас 2004 онд төрсөн, 16 настай эмэгтэй нас барсан байдалтай олдсон. Талийгаачийг түүний төрсөн ах 18 настай С.Г онц хэрцгий аргаар хохироож, хэргийг нуун далдлах зорилгоор хэргийн газраас өөр газар цогцсыг аваачиж, хаясан байсан нь эхний шалгалтаар тогтоогдоод байна. Цагдаагийн байгууллага тухайн хэрэгт Монгол Улсын Эрүүгийн хуулийн тусгай ангийн 10 дугаар бүлэг 10.2.1-т зааснаар онц хэрцгий гэдэг заалтаар шалгалтын ажиллагаа явуулж байна. 

-С.Г нь урьдчилсан мэдүүлэгтээ дүүгийнхээ амь насыг хөнөөсөн гэдгээ мэдэгдсэн байсан. Энэ талаар тайлбар өгвөл?

-Урьдчилсан мэдүүлгээр дүүгийнхээ амь насыг хөнөөсөн гэдгээ мэдэгдсэн. Талийгаач охин арваннэгдүгээр сарын 03-ны өдөр гэрээсээ гараад сураггүй алга болсон гэдэг байдлаар ээж нь цагдаагийн байгууллагад хандан эрэн сурвалжлуулах хүсэлт өгсөн. Үүний дагуу цагдаагийн байгууллага эрэн хайх ажиллагаа явуулж байсан. Талийгаачийг арваннэгдүгээр сарын 3-ны өдөр хохироосон нь тогтоогдсон.

-Гэр бүлийн таарамжгүй харилцаанаас энэ хэрэг үүссэн гэх мэдээлэл байсан. Энэ үнэн болов үү?

-Энэ гэмт хэргийн сэдэл санаа, зорилгыг тогтоохын тулд цаг хугацаа орно. Гэмт хэрэгтний хэлж байгаа мэдүүлгээр тодорхойлох боломжгүй. Гэрчүүдийн мэдүүлэг болон гэмт хэрэгтний мэдүүлгийг эцэслэн үзэж шүүхийн шатанд гэмт хэргийн сэдэл, санааг  бүрэн тогтоох боломжтой.