Нийслэлийн авто замын халтригаа гулгааг багасгах зорилгоор жил бүр зориулалтын бодис худалдан авдаг. Тэгвэл уг бодисыг хужраар орлуулан, бодис авахаар төсөвлөсөн хөрөнгийг зориулалтын бусаар ашигласан байж болзошгүй талаар эх сурвалжууд мэдээллээд байгаа юм.

     Халтиргаа гулгаа арилгах зориулалтын бодис худалдан авах гэрээг тухайн үеийн хотын менежер нийслэлийн захирагчийн албаны түр орлон гүйцэтгэгч Д.Ганбат “Мөнх сонор трейд” ХХК-тай хийсэн баримт бий. Гэвч гэрээг голлон байгуулсан Д.Ганбатыг өнгөрсөн оны арванхоёрдугаар сард үүрэгт ажлаас нь чөлөөлсөн байдаг. Уг хэрэгтэй холбогдуулан Д.Ганбатыг албан тушаалаас нь чөлөөлсөн гэх мэдээлэл ч олны дунд байгаа юм.

        Нийслэл рүү их хэмжээний хужир Төв аймгийн Бүрэн сумаас нийлүүлж байгаа талаар бид Төв аймгийн Бүрэн сумын Засаг даргын Тамгын газрын холбогдох албан тушаалтнаас тодруулахад “Манай сумаас их хэмжээний хужир нийслэл рүү нийлүүлж байгаа нь үнэн. Өнгөрсөн арванхоёрдугаар сараас эхэлж нийлүүлсэн. Манай сум хужрын арвин нөөцтэй. Засаг даргын Тамгын газар болон холбогдох газруудаас ямар зориулалтаар ашиглах талаар зөвшөөрөл аваагүй. Уг нь манайх хужир авахад зөвшөөрөл өгч, тодорхой хэмжээний татвар авдаг. Хужир авч байгаа газар нь хувийн компани гэсэн. Уг нь хужир авахад татвар авдаг ч, энэ жил нутгийн иргэдийг ажиллуулж байгаа учраас татвар авахгүй гэж тохиролцсон” гэх мэдээлэл өглөө.