Цагдаагийн байгууллага энэ сарын 4-ний өдөр “Нэр бүхий этгээд бүлэглэн архины хамаарал бүхий, орон гэргүй иргэдийг Төв аймгийн Эрдэнэ сумын нутаг дэвсгэрт байрлах Их нарт, Хүрэн морьтын даваа гэх газарт зорчих эрхийг хязгаарлаж, эрхшээлдээ байлган албадан хөдөлмөрлүүлсэн байж болзошгүй” дуудлага хүлээн авч, Эрүүгийн хуулийн тусгай ангийн 13.13 дугаар зүйлийн 1 дэх хэсэгт зааснаар албадан хөдөлмөрлүүлэх хэрэг бүртгэл нээн иргэн Г нарын дөрвөн сэжигтнийг холбогдуулан мөрдөн шалгах ажиллагаа эхлүүлжээ.

Шалгалтын явцад нэр бүхий 21 иргэнээс гэрчийн мэдүүлэг авч, ШШҮХ-гийн шинжээчийг томилж, хохирсон байж болзошгүй иргэдийн биед учирсан гэмтлийн зэргийг тогтоолгохоор ажиллаж байна. Иргэдийг албадан хөдөлмөрлүүлсэн байж болзошгүй Г нар нь “Фэйсбүүк” сүлжээнд “Самарт авч явна” гэсэн зар оруулж, иргэдтэй самарт авч яван олсон ашгийг 40/60 харьцаатай хувааж авахаар тохиролцжээ. Ингэхдээ зарим иргэний хөлсийг өгөөгүй, авч явсан хүмүүсийнхээ биед халдсан зэрэг зөрчил урьдчилсан байдлаар тогтоогдсон байна.

                             Мөн Төв аймгийн Эрдэнэ сумын нутагт орших Их нарт, Хүрэн морьтын даваа гэх газарт самарч явсан уг хэрэгт ямар нэгэн байдлаар хохирсон иргэдийн гомдол, мэдээллийг Эрүүгийн цагдаагийн албаны 262066, 262425 дугаарын утсаар хүлээн авч байгаа аж.