Ховд аймгийн Мянгад суманд энэ сарын 7-8 шилжих шөнө 53 настай Ц хоёр сартай зээ охиноо малын тэжээлээр дарж, амийг нь хөнөөсөн байж болзошгүй хэрэг гарсан. Тодруулбал, охиноо Говь-Алтай аймаг руу хичээлдээ явсан хойгуур нь зээ охиноо санаатайгаар хөнөөсөн байж болзошгүй гэх хэргийг тус аймгийн цагдаа нар шалгаж байгаа аж.

     Энэ талаар Ховд аймгийн Цагдаагийн газрын  дэд дарга, дэд хурандаа Ц.Булганбаатар “Зээ охиноо малын тэжээлээр дарж хөнөөсөн гэх дуудлага, мэдээлэл цагдаагийн газар албан ёсоор бүртгэгдээгүй. Харин дээрх хэрэг гарсан байж болзошгүй мэдээллийн дагуу цагдаагийн газрынхан мөрдөн шалгах ажиллагааг үргэлжлүүлж байгаа. Талийгаачийн гэр бүлийнхэн буюу өвөө, эмээ нь үгсэн тохиролцож, хоёр сартай зээгээ малын тэжээлээр дарж, амийг нь хөнөөгөөд, цогцсыг оршуулчихсан байсныг цагдаа нар илрүүлсэн. Зээ охиноо санаатайгаар хөнөөсөн байж болзошгүй иргэнд Эрүүгийн хэрэг үүсгэж, хойшлуулшгүйгээр баривчилсан. Талийгаач охин өвөө, эмээтэйгээ амьдардаг байсан юм билээ. Хүүхдийн ээж нь оюутан, эцэг нь өөр газар ажиллаж, амьдардаг байсан” гэлээ.