УБТЗ-ын Дотоод аудитын албаны дарга Ж.Пунцагийг 2022 оны нэгдүгээр сарын 19-ны шөнө АТГ-аас саатуулсан байдаг. Тодруулбал, түүнийг эрх мэдэл, албан тушаалын байдлаа урвуулан ашиглаж, үндэслэлгүй хөрөнгөжсөн хэмээн үзэж байсан. Гэвч түүнийг АТГ-аас 48 цагийн хугацаатай баривчлаад сулласан байдаг.

      Ж.Пунцаг нь Ерөнхий сайд Д.Оюун-Эрдэнэ, Байгаль орчин, аялал жуулчлалын сайд Б.Бат-Эрдэнэ, Зам тээврийн дэд сайд асан Б.Цогтгэрэл нартай дотно найзууд гэгддэг. Тэрбээр өмнө нь хоёр удаа хорих ял сонсож байсан ч тэнсэх ялаар солиулж, улмаар албан тушаалд томилогдож иржээ. Тодруулбал,  Ж.Пунцаг нь 2002 онд Цагдаагийн академи төгссөн. Сургуулиа төгсөөд Өвөрхангай аймгийн Бат-Өлзий сумын цагдаагийн хэсгийн төлөөлөгчөөр ажиллаж эхэлсэн. Хэсгийн төлөөлөгч байхдаа О.У, Ж.Ш, Ш.Б, М.Б нарт хүч хэрэглэсэн, зодож танхайрсан, энэ үйлдэлдээ зэвсэг ашигласан хэмээн гурван жилийн хорих ялаар шийтгүүлсэн ч тэнсэн харгалзах болгон өөрчлүүлж байсан гэх мэдээлэл бий. Хэдий эл хэргээсээ чөлөөлөгдөж чадсан ч удалгүй цагдаагийн байгууллагын гүйцэтгэх ажиллагааны нууц задруулсан үндэслэлээр ахлах дэслэгч цолоо хураалгаж, 2006 онд цагдаагийн байгууллагаас гарсан нэгэн аж. Цагдаагийн албанаас гарсан Ж.Пунцаг Иргэний харьяалал, шилжилт хөдөлгөөний ерөнхий газрын Хяналт шалгалтын улсын ахлах байцаагчаар томилогдсон. Гэвч мөн л "засарсангүй", ахлах байцаагчийн албан тушаалаа ашиглан БНХАУ-ын хөрөнгө оруулалттай “Си Ар Жи девелопмент” ХХК-ийн захирал Жан Юү Шингээс таван сая төгрөгийн авлига авсан, бизнес ангиллын визээр Монгол Улсад орж ирээд хөдөлмөр эрхэлсэн, визний хугацаагаа хэтрүүлсэн 14 хятад иргэнийг буцаж хил нэвтрэх эрхтэйгээр нутаг буцаасан зэрэг хэргээр АТГ-т шалгагдаж, дээрх хэргүүд нь нотлогдсоноор 2015 онд 1.6 жилийн хорих ял сонсож, төрийн албанд ажиллах эрхээ хоёр жилээр хасуулсан аж. Гэхдээ мөн л хоёр жилийн тэнсэн болгон өөрчлүүлж чадсан байдаг.