Ерөнхий боловсролын 47 дугаар сургуулийн 12 дугаар ангийн сурагчид доод ангийнхаа хүүхдүүдийг зодож, дээрэлхэж буй бичлэг олон нийтийн сүлжээгээр цацагдсан. Тодруулбал, олон нийтийн цахим сүлжээнд энэ сарын 3-ны өдөр нийтлэгдсэн бичлэгийн дагуу цагдаагийн байгууллагаас шалгалтын ажиллагаа хийжээ. Шалгалтаар 17 настай эрэгтэй Т, 17 настай  эрэгтэй М нар нь энэ оны арвандүгээр сарын 10-ны өдөр Баянгол дүүргийн нутаг дэвсгэрт үл таних эрэгтэйтэй маргалдах үедээ болон хоёрдугаар сард 16 настай, эрэгтэй Т-г найз охинтой нь харилцаа тогтоолоо гэх шалтгаанаар биед нь халдсан болохыг тогтоосон. Холбогдогч нар өөрийн гар утсанд дээрх бичлэгийг хадгалж байгаад, найзууддаа дамжуулснаар цахим орчинд нийтлэгдсэн. Дээрх хоёр гэмт хэргийн шинжтэй үйлдэл нь цагдаагийн байгууллагад урд өмнө бүртгэгдээгүй. Одоогийн байдлаар хохирогчид гэмтлийн зэрэг тогтоох чиглэлээр Шүүх шинжилгээний үндэсний хүрээлэнгийн шинжээч эмч томилон шинжилгээ хийлгэх, хохирогч болон холбогдогч нарыг дүүргийн Гэр бүл, залуучуудын хөгжлийн хэлтэс, хорооны хамтарсан багт холбон зуучлах зэрэг ажиллагааг хийгээд байгаа аж.