Ховд аймгийн Дарви сумын хэсгийн төлөөлөгч Б.Мөнхбаатарт нь бага насны хүүхдийг гавлаж, эрүү шүүлтэд оруулсан гэх хэргийн талаар бид өмнө мэдээлсэн.

    Хэргийн талаар охины ээж О ярихдаа “Цагдаагийн албан хаагч Б.Мөнхбаатар гэгч нь 13 настай охиныг минь 24 цаг гавлаж, унадаг дугуй хулгайлсан хэрэгт гүтгэж, буу тулгаж, хоолойг нь боож, чихнийх нь ээмгийг хугартал алгадсан байна лээ. Охиныг минь хууль бусаар саатуулж, 24 цаг тамласан цагдаагийн дэслэгч Б.Мөнхбаатарт маш их гомдолтой байна. Цагдаагийн эхнэр Ж над руу залгаж, элдэв бусаар хэлж байна лээ. “Унадаг дугуй гаргаж өг” удаа дараа дарамталж, сүрдүүлсэн” гэсэн юм.

    Тэгвэл Б.Мөнхбаатарт холбогдох хэргийн шүүх хурал 2022 оны арваннэгдүгээр сарын 14-ний өдөр Ховд аймаг дахь эрүүгийн хэргийн анхан шатны шүүх дээр болсон юм. Прокурор хоёр  жилийн хорих ял төлөвлөж шүүх хуралдаанд оролцсон байна. Эрүүгийн хэргийн 21.12 дугаар зүйлийн 1-д зааснаар түүнийг гэм буруутайд тооцож нээлттэй хорих ангид нэг жилийн ял эдлүүлэхээр шийдвэрлэжээ.