Эмэгтэйчүүдийн хорих ангийн гурван давхраас хоёр залуу унаж, гэмтсэн гэх мэдээлэл гарсан. Тодруулбал, Баянзүрх дүүргийн 21 дүгээр хорооны нутаг дэвсгэрт байрлах эмэгтэйчүүдийн баривчлах байрны гурван давхраас 18, 20 настай хоёр эрэгтэй энэ сарын 9-нд унаж, бэртжээ. Энэ талаар Шүүхийн шийдвэр гүйцэтгэх Ерөнхий газрын хэвлэл мэдээллийн ажилтнаас тодрууллаа. Тэрбээр “Шүүхийн шийдвэр гүйцэтгэх ерөнхий газрын харьяа Баривчлах байрнаас энэ сарын 9-нд С.Т, Н.Н нар цонхоор оргон зайлахыг завдахдаа унаж бэртсэн. Тухайн үед тус байрны алба хаагч Яаралтай түргэн тусламжийн төвд дуудлага өгснөөр дээрх этгээдүүд Гэмтэл согог судлалын үндэсний төвд хүргэгдэн эмчлэгдэж байна. Одоогийн байдлаар баривчлагдсан этгээдүүдийн биеийн байдал хэвийн байна.

    С.Т, Н.Н нар есдүгээр сарын 23-нд газ үнэрлэн мансуурч, иргэн Э-ийн гар утасны дэлгэцийг хагалж, биед нь хохирол учруулахгүйгээр халдсан зөрчил үйлдсэн тул Зөрчлийн тухай хуулийн тусгай ангийн 5.1 дүгээр зүйлийн 3-т зааснаар 20 цагийн албадан сургалтад хамруулж, 14 хоног саатуулагдах шийтгэл эдэлж байсан” гэлээ.