Улс орон даяар "Ковид-19" цар тахлын тархалтыг зогсоох, урьдчилан сэргийлэх бүх нийтийн бэлэн байдлыг зарлан, хөл хорионы дэглэмд шилжсэн энэ үеийг ашиглан хилээр гаргах хориотой ан амьтны эд эрхтэн, ховор ургамал, үнэт чулууг улсын хилээр гаргахыг завдсан гэмт хэргүүд гарсаар байна.

Сүүлийн өдрүүдэд Гаалийн ерөнхий газрын харьяа Гашуунсухайт дахь гаалийн газрын хяналт шалгалтаар мал амьтны эд эрхтэн, байгалийн үнэт чулуу, ховор ургамлын гаралтай эд зүйлийг хууль бусаар улсын хилээр гаргахыг завдсан зөрчлүүд олноор бүртгэгдэж байна. Тухайлбал, Гашуунсухайтын боомтоор арваннэгдүгээр сарын 09, 10-ны өдрүүдэд нүүрс тээвэрлэн гарах чиглэлд зорчин явсан "Гранд мотор" ХХК, "Баянговь транс" ХХК-ийн тээврийн жолооч нар нүүрсээр өнгөлөн далдлалт хийж  40 шуудай, 600 кг эрвэгэр жирвэгэрүү ургамлын үндэс, 40 шуудай 1275,5 кг малын хатаасан өлөн, 30 уут 919 кг байгалийн мана чулууг нууж, улсын хилээр нэвтрүүлэхийг завдсан гэмт хэргийн шинжтэй зөрчлийг гаалийн байгууллага илрүүлэн шалгаж байна.