ОСНААУГ-ын дарга Ч.Мэндбаяр албан тушаалаа урвуулан ашиглаж, улсаас их хэмжээний мөнгө завшсан байж болзошгүй хэргийг АТГ-аас шалгаж эхэлсэн. Тэгвэл уг хэрэгт Монголын нэртэй генерал, МАН-ын нөлөө бүхий албан тушаалтан оролцож, замхруулан улмаар хэргийг хэрэгсэхгүй болгож байгаа гэнэ.

Ч.Мэндбаярыг Эрүүгийн хуулийн 22.1 дэх хэсэгт заасан эрх мэдлээ урвуулан ашигласан гэх үндэслэлээр хэрэг бүртгэлтийн хэрэг нээн шалгаж эхэлсэн. Шалгалтын үеэр АТГ-аас Ч.Энхбаярыг саатуулж, цагдан хорьж байв.

                 Эргэн сануулахад, Монгол Улсын Засгийн газраас 2020 оны арванхоёрдугаар сараас эхлэн айл өрх, аж ахуйн нэгж, байгууллагуудын цахилгаан, цэвэр, бохир ус, дулаан, уур, хогны төлбөрийг төлөх шийдвэр гаргасан. Засгийн газрын шийдвэрийн дагуу цар тахлын үед өрх, албан байгууллагыг дэмжих зорилгоор тог цахилгаан, цэвэр, бохир ус, дулаан, уур, хогны төлбөрийг “Эрдэнэт үйлдвэр”-т хариуцуулж, төлж байв. Харин ОСНААУГ-ын дарга Ч.Мэндбаяр айл өрх, албан байгууллагыг дэмжих зорилгоор гаргасан төрийн мөнгөнөөс усны төлбөрт илүү бичилт хийх замаар завшсан байж болзошгүй гэх үндэслэлээр АТГ-аас газраас шалгаж эхэлсэн юм.

-Ч.МЭНДБАЯР ГЭЖ ХЭН БЭ-

Ч.Мэндбаяр нь 1978 оны арваннэгдүгээр сарын 18-нд Өвөрхангай аймагт төрсөн. Тэрбээр бүрэн дунд боловсролыг Өвөрхангай аймгийн Хархорин суманд эзэмшиж, 1996 онд Батлан хамгаалахын их сургуульд удирдлагын ухааны чиглэлээр суралцах болсон байна. Батлан хамгаалахын их сургуулийг 2000 онд төгсөж, түүнээс хойш таван жилийн дараа буюу 2005 онд Удирдлагын академийг удирдахуйн ухаан, 2008 онд МУИС-ийг эрх зүйч мэргэжлээр дүүргэжээ.

                 Ч.Мэндбаяр нь 2000-2003 онд Зэвсэгт хүчний 150 дугаар ангийн салаан захирагч, 2003-2006 онд "Амин-Од" ХХК-ийн захирал, 2006-2007 онд Баянгол дүүргийн ЗДТГ-ын Аж ахуйн тасгийн дарга, 2007-2008 онд Баянгол дүүргийн ХХҮХ, ЗХА-ны ахлах мэргэжилтэн, 2010-2011 онд "Монголын цахилгаан холбоо"-ны хүний нөөцийн мэргэжилтэн, 2013-2015 онд "Дэвжих эрдэнэ" ХХК-ийн гүйцэтгэх захирал, 2016-2019 онд Баянгол дүүргийн ЗДТГ-ын ХХҮХ-ийн дарга, 2019-2020 онд "ОСНААУГ" ОНӨААТҮГ-ын даргаар ажиллаж байв. Тэрбээр НИТХ-ын төлөөлөгчөөр ажиллаж байна.