Архангай аймгийн Өгийнуурт “Триатло-2022” улсын аварга шалгаруулах тэмцээн өчигдөр эхэлжээ. Тус тэмцээний үеэр 42 настай тамирчин усанд унаж, амиа алдсан гэх мэдээлэл бий. Энэ талаар Өгийнуур сумын Засаг дарга Ш.Үүрцайхаас тодрууллаа.

    Тэрбээр “Өчигдөр Өгийнуурт “Триатло-2022” улсын аварга шалгаруулах тэмцээн болсон. Тус тэмцээнд  оролцож байсан Орхон аймгийн 42 настай иргэн амиа алдсан харамсалтай хэрэг гарсан. Талийгаачийн зүрх хаагдсаны улмаас усанд унаж, амиа алдсан гэх шүүхийн шинжилгээний урьдчилсан дүгнэлт гарсан. Тус тэмцээний үеэр манай сумын эмч, ажилчид Өгийнуурт ажиллаж байсан учир түргэн тусламжийн арга хэмжээг яаралтай авсан боловч тэсээгүй юм билээ. Тэгээд задлан шинжилгээ хийж, цагдаагийн байгууллагаас хэргийг шалгаж, цогцсыг ар гэрийнхэнд нь хүлээлгэж өгсөн. Тус тэмцээн анх манай суманд болсон” гэлээ.