Үндсэн хуулийн цэцийн гишүүн Ц.Нанзаддоржийг “Сахал” Д.Эрдэнэбилэгийн хэрэгт холбогдуулан АТГ-аас шалгаж эхэлжээ. Тодруулбал,  АТГ-аас Худалдаа хөгжлийн банкны ТУЗ-ийн дарга Д.Эрдэнэбилэгийг “Дарханы төмөрлөгийн үйлдвэр”, “Хөтөлийн цемент шохойн үйлдвэр”-ийн Хөгжлийн банкнаас авсан зээлтэй холбоотой хэргээр яллагдагчаар татаж, цагдан хорьсон. Түүний хэрэгт Үндсэн хуулийн цэцийн гишүүн асан Д.Сугар, Үндсэн хуулийн цэцийн гишүүн Ц.Нанзаддорж нар холбогдож, тэднийг хуулийн байгууллагаас шалгаж, Д.Сугарыг яллагдагчаар татсан.

      Харин Ц.Нанзаддорж Үндсэн хуулийн цэцийн гишүүн учир бүрэн эрхийнхээ хүрээнд эрх мэдэл, албан тушаалаа ашиглаж, Үндсэн хуулийн цэцийн гишүүдэд нөлөөлж, АТГ-аас явуулж буй шалгалтын ажиллагааг удаашруулж байгаа гэдгийг эх сурвалжууд хэлсэн юм. Тиймээс Ц.Нанзаддорж Үндсэн хуулийн цэцийн гишүүд болон бусад эрх мэдэлтнүүдээр өөрийгөө хамгаалуулж, хэргээ хаацайлуулж байгаа гэнэ. 

    Дашрамд дурдахад, Д.Сугар нь Төрийн өмчийн хорооны даргаар ажиллаж байхдаа тухайн үеийн ТӨХ-ны Төрийн өмчийн удирдлага, хувьчлалын газрын дарга, одоогийн Үндсэн хуулийн цэцийн гишүүн Ц.Нанзаддоржтой хамт “Дарханы төмөрлөгийн үйлдвэр”-ийг Д.Эрдэнэбилэгийн “Кью Эс Си” ХХК-д концессоор эзэмшүүлэх бүх шийдвэрүүдийг гаргаж, гэрээг нь үзэглэсэн байдаг ажээ.

ЦАГААНЫ НАНЗАДДОРЖ ГЭЖ ХЭН БЭ

    Тэрбээр 1962 онд Говь-Алтай аймагт төрсөн. Хуульч мэргэжилтэй. 1984-1994 онд Говь-Алтай аймгийн АДХ-ын гүйцэтгэх захиргаа, Өмч хувьчлалын комисст ахлах мэргэжилтэн, 1994-1996 онд “Ажираг” ББХК-д менежер, 1996-2000 онд Төрийн өмчийн хороонд ахлах мэргэжилтэн, газрын орлогч дарга, газрын дарга, 2000-2004, 2010-2012, 2013-2015 онд “Гурван гол холдинг” ХХК-д дэд захирал, 2004-2010 онд Төрийн өмчийн хорооны Төрийн өмчийн удирдлага, хувьчлалын газрын дарга, 2012-2013, 2015-2016 онд Төрийн өмчийн хорооны дарга, 2016-2018 онд “BOD” ХХН хуулийн фирмд хуулийн зөвлөхөөр ажиллаж байжээ. 2018 онд Монгол Улсын Их Хурлын 35  дугаар тогтоолоор Монгол Улсын Үндсэн хуулийн цэцийн гишүүнээр томилогдон ажиллаж байна.