Төр, нийгмийн зүтгэлтэн С.Зориг агсныг  хөнөөсөн хэргээр гурван шатны шүүхээс 20 жилийн ял сонсож, зургаан жил хоригдсон Б.Содномдаржаа, Т.Чимгээ нар 2021 оны тавдугаар сарын 14-нд батлан даалтад гарсан билээ. Учир нь тэднийг батлан даалтад гаргах шинээр үүссэн нөхцөл байдал тогтоогдож, Улсын дээд шүүхээс батлан даалтад гаргах шийдвэр гарсан байдаг. Өөрөөр хэлбэл, Б.Содномдаржаа,  Т.Чимгээ нарт ял оноохдоо  хууль хяналтынхан “Эрүүдэн шүүсэн” гэж Улсын Дээд шүүхийн шүүгч нар үзсэн байдаг аж.

   Тодруулбал, тэднийг эрүүдэн шүүсэн хэрэгт ТЕГ-ын дарга асан Б.Хурц, Улсын Ерөнхий прокурорын орлогч асан Г.Эрдэнэбат нарыг гэм буруутайд тооцож, шүүхээс ял оноосон. Гэвч тэд жил хүрэхгүй хугацаанд хоригдож, Өршөөлийн хуулиар суллагдсан юм. Харин ТЕГ-ын Мөрдөн байцаах албаны дарга О.Бархасбадийн шүүх хурлаас шалтгаалж Т.Чимгээ, Б.Содномдаржаа нарыг дахин шинээр шалгах эсэх нь тодорхой болно. Тиймээс О.Бархасбадийн шүүх хурал хэзээ болох талаар Б.Содномдаржаагийн ээж Б.Жавзмаагаас тодрууллаа.

     Тэрбээр “ТЕГ-ын Мөрдөн байцаах албаны дарга О.Бархасбадийн шүүх хурал энэ сарын 11-нд Төв аймагт болно. Содномдаржаа шүүх хуралдана оролцоно. Тус шүүх хурлын шийдвэр яаж гарахаас хамаарч Содномдаржаа, Чимгээ нарыг шалгах ажил эхлэх байх. Хүү минь эмчилгээ хийлгээд байгаа мөртлөө бие нь дээрдэхгүй юм. Нуруу, гар, хөл нь байнга өвддөг болохоор хэцүү байна” гэлээ.