Дархан-Уул аймаг дахь Уул уурхайн эрчим хүчний Политехник коллежийн захирал Ш.Мөнгөндуулга багш нараа дарамталж, сүрдүүлж, зодож, танхайрдаг гэх мэдээлэл, бичлэг олон нийтэд ил болсон. Тус бичлэгийг олон нийтийн сүлжээнд байршуулсан иргэн “Ш.Мөнгөндуулга захирал нэг багшийг зодож, уруулыг нь хэгзэлсэн. Сургуулийнхаа хашаагаа цоожилж багш, ажилчдаа нэг хаалгаар оруулж, гаргадаг. Өдөрт дөрвөн удаа хурууны хээгээ уншуулж бүртгэхийг шаарддаг” хэмээн бичсэн байна.

         Энэ талаар тус сургуулийн захирал Ш.Мөнгөндуулгаас тодрууллаа. Тэрбээр “Би багш, ажилчдаа дарамталж, зоддоггүй. Үүнээс өөр мэдээлэл өгөх боломжгүй байна” гэв. Харин Дархан-Уул аймгийн Боловсролын газрын дарга С.Галаагаас Ш.Мөнгөндуулга захиралтай холбоотой гомдол санал ирж байсан эсэх талаар тодруулахад “Тус захиралтай холбоотой гомдол, мэдээлэл өмнө нь ирж байгаагүй. Саяхан олон нийтэд ил болсон бичлэгтэй холбоотойгоор түүнийг шалгасан. Тэгээд ХНХЯ-ны Ёс зүйн хорооны хурлаар оруулсан гэх мэдээлэл байгаа. Миний мэдэхээр Ш.Мөнгөндуулга 10-аад жил тус сургуулийн захирлаар ажиллаж байгаа” гэв.