ЦЕГ: Он гарсаар соёлын өв, бурхан хулгайлсан долоон гэмт хэрэг гарснаас зургааг нь илрүүлээд байна

2021-08-12, 824

Улаанбаатар хот болон орон нутагт үйлдэгдэж байгаа соёлын өвийн хулгай, соёлын өвийн хадгалалт, хамгаалалтын асуудлаар Соёлын яам болон ЦЕГ-ын Эрүүгийн цагдаагийн албанаас мэдээлэл хийж байна.

ЦЕГ-ын Эрүүгийн цагдаагийн албаны 3-р хэлтсийн тасгийн дарга, цагдаагийн хошууч С.Бямбадэлгэр "Энэ оны эхний найман сарын байдлаар соёлын өв, түүх соёлын эд зүйлсийг хулгайлсан долоон гэмт хэрэг гарсан. Үүнээс зургааг нь цагдаагийн байгууллага илрүүлэн, холбогдох этгээдүүдийг баривчилсан.

Одоогоор нэг хэрэг дээр нь ажиллаж байна. Нийт таван этгээд зургаан удаагийн үйлдлээр Архангай, Завхан, Өвөрхангай аймаг болон Сонгинохайрхан, Багануур дүүргийн хийдүүдээс Майдар бурхан гурав, Богдзонхав бурхан хоёр, Занабазар бурхан нэг, зэс бурхан нэг, Алтангэрэл судар, эмээлийн тоноглол зэрийг хулгайлсан болохыг тогтоосон.

Соёлын өвийг хулгайлсан таван этгээдийн хоёр нь өмнө нь хоригдож байсан бөгөөд өршөөлөөр суллагдсан. Эдгээр этгээдүүд аялал зугаалгаар явах нэрээр музей, хийд зэрэгт очиж, хулгайлах зүйлсээ судалдаг байсан нь тогтоогдсон.

Музей, соёлын өв хадгалах газруудын харуул хамгаалалт сул байгаа нь хулгай гарах үндэс болж байна. Мөн иргэн өөрийн эзэмшдэг соёлын өвийг бүртгүүлэх ёстой. Үүнийг мэдэхгүй, бүртгэлгүй байгаагийн улмаас цагдаагийн байгууллагын ажилд хүндрэл учирдаг. Соёлын өвийн гэмт хэргүүд зохион байгуулалттай болсон. Мэдээж худалдан авагч, худалдаалагч байна. Тэднийг холбодог зуучлагч бий. Энэ тал дээр бид олон улсын байгууллагатай харилцаж байна" гэлээ.

ЦЕГ: Он гарсаар соёлын өв, бурхан хулгайлсан долоон гэмт хэрэг гарснаас зургааг нь илрүүлээд байна

АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.