Цагдаагийн алба хаагчид хоёр иргэнд хүч хэрэглэж, биед нь халдаж байгааг баримтжуулсан хяналтын камерын бичлэг олон нийтийн сүлжээгээр цацагдсан. Тэгвэл үүнтэй холбоотойгоор ЦЕГ-ын удирдлагуудыг огцруулах асуудлаар МАН-ын удирдлагууд хуралдан байгаа талаар эх сурвалж мэдээллээ.

Дээр дурдсан хэргийн талаар ЦЕГ-ын Гэрч хохирогчийг хамгаалах хэлтсийн дарга, цагдаагийн хурандаа Д.Манлайбаатар мэдэгдэл өгсөн.

Тэрбээр “Өчигдөр цахим хуудсаар цагдаагийн алба хаагчид иргэний эрх чөлөөнд халдаж байгаа талаарх бичлэг цацагдсан. Тус бичлэг 2019 оны хоёрдугаар сарын бичлэг байсан. Чингэлтэй дүүргийн гуравдугаар хороонд байрлах цэнгээний газарт иргэд “төлбөр тооцоо хийхгүй, танхайрч байна” гэх дуудлагын дагуу цагдаагийн алба хаагчид очиж ажилласан байна.

          Энэ үеэр үүрэг гүйцэтгэж байсан цагдаагийн нэр бүхий албан хаагчид иргэдийн эрх чөлөөнд халдаж, тодорхой хэмжээний зөрчил гаргасан гэдэг нь шалгалтаар тогтоогдсон. Эл үйлдлийг цагдаагийн албан хаагчид болон иргэд хоорондоо ярилцаж, цагдаагийн газарт бүртгүүлэлгүй нуун дарагдуулсан гэдэг нь өчигдөр цахим хуудаст цацагдсанаар ил болсон.

          Үүнтэй холбогдуулан цагдаагийн байгууллагын удирдлагаас хойшлуулшгүй арга хэмжээ авах үүрэг чиглэл өгч, мөрдөн шалгах ажлын хүрээнд гэмт хэргийн шинжтэй хэмээн үзэж прокурорын байгууллагын хянаж шалгах ажиллагааны харьяаллаар  хэргийг АТГ-т хүргүүлэхээр ажиллаж байна” гэсэн юм.