Онцгой байдлын ерөнхий газрын аврах багийнхан өнгөрсөн өдөр усанд осолдсон гурван иргэний цогцсыг олж, Цагдаагийн байгууллагад хүлээлгэн өгчээ. Тодруулбал, Булган аймгийн Хутаг-Өндөр сумын Хантай багийн Нуга гэдэг газар долдугаар сарын 15-нд 13 хүн Эгийн голын эрэгт зугаалж байснаас нэг нь голд сэрүүцэхээр ороод живсэн. Улмаар Орхон аймгийн харьяат иргэн 23 настай, эрэгтэй Б-н цогцсыг долдугаар сарын 18-нд осолдсон газраас зүүн зүгт 30 километрт Цонхлон хайрхан гэдэг газар Эгийн голын усны мандалд хөвж байсныг олжээ.

    Мөн Хэнтий аймгийн Баянхутаг сумын Цант багийн Хаяаны дэрс гэдэг газар Малчин Г явганаар үхэр тууж явахдаа Хэрлэн голд долдугаар сарын 15-нд живсэн. Улмаар иргэн 29 настай, эрэгтэй Г-ын цогцсыг осолдсон газраас зүүн хойд зүгт гурван километрт Цант багийн Чандгана гэдэг газар Хэрлэн голын усны мандалд хөвж байсныг өчигдөр олсон байна.

    Архангай аймгийн Тариат сумын Хорго багийн “Ар-үзүүрийн-Ам” гэдэг газар 12 хүн Тэрхийн цагаан нуурын эрэгт зугаалж байхад Төв аймгийн Өндөрширээт сумын харьяат иргэн 42 настай, эрэгтэй Б живжээ. Улмаар Тэрхийн цагаан нуурт долдугаар сарын 18-ны өдрийн 09:25 цагт эрэн хайх ажиллагааг эхлүүлж, иргэн Б-ын цогцсыг нуурын баруун хойд эргээс 50 метрийн зайд, 10 метрийн гүнээс олж, тус аймаг дахь Цагдаагийн газарт шилжүүлж өгчээ.