-Манай байгууллага хуульчидтай хамтарч, хоёр хоногийн өмнөөс Засгийн газрын шийдвэртэй холбоотойгоор төрийн байгууллагууд руу шаардлага хүргүүлж, нөлөөллийн ажлаа эхэлсэн. Ковидын вакцин хийлгээгүй хүүхдүүд цар тахлын үед хурдан морины уралдаанд оролцох нь эрсдэлтэй. Тиймээс Засгийн газар хүүхдийн дээд ашиг сонирхлыг хөндсөн тогтоол гаргасан гэж үзээд “171 дүгээр тогтоолынхоо зарим хэсгийг өөрчилнө үү” хэмээн нэхэмжлэл гаргаж байгаа юм. 2021 оны зургадугаар сарын 23-ны Засгийн газрын 171 дүгээр тогтоолын хоёр болон гуравт “Халдвар хамгааллын дэглэмийг сахин хурдан морины уралдаан зохион байгуулах” тухай заасан. Иргэний нийгмийн байгууллага, эрх зүйчид хамтран энэ тогтоолыг биелүүлж эхлэхээс урьтаж, тогтоолын тус хэсгүүдийг өөрчлүүлэхийг зорьж байна.

-Энэ жилийн наадмаар хэдэн хүүхэд хурдан морь унах талаар тоон мэдээлэл авсан уу?

         -Бид энэ жилийн наадмаар 387 хүүхэд уралдана гэсэн тоо баримтыг олж аваад байна. Гэхдээ өчигдөр (уржигдар) есөн мянга орчим морь уралдана гэж байсан. Тэгэхээр тэр олон морийг унах хүүхдүүдийн тоо нэмэгдэх болов уу. Албан ёсоор наадмын хурдан морины уралдаанд оролцох унаач хүүхдийн тоо байдаггүй юм билээ.

-Та бүхэн дараагийн удаа ямар арга хэмжээ хэрэгжүүлэх вэ?

       -Юун түрүүн бид Засгийн газрын 171 дүгээр тогтоолыг хүчингүй болгох тухай нэхэмжлэл Захиргааны хэргийн шүүхэд гаргасан. Мөн энэ асуудалд хүүхдийн эрхийн чиглэлээр ажилладаг олон улсын иргэний нийгмийн байгууллагуудыг татан оролцуулахаар лобби бүлэг үүсгэн ажиллаж байна. Одоогийн байдлаар манай байгууллага 30 орчим байгууллага руу албан хүсэлт, мэдээлэл явуулж байна. Мөн Ерөнхий сайд, Эрүүл мэнд, Хөдөлмөр нийгмийн хамгааллын сайд, УОК, аймаг, нийслэлийн Засаг дарга нар руу албан бичиг илгээлээ. Төрийн байгууллага руу явуулах албан бичгээ Мэдээллийн ил тод байдлын тухай хуульд үндэслэн хурдан морины уралдаан зохион байгуулах тал дээр судалгаа шинжилгээ, эрсдэлийн үнэлгээ хийсэн үү, тоон мэдээлэл өгөөч гэдэг талаас явуулж байна. Мөн Хүүхдийн эрхийн хороо, Дэлхийн зөн, Японы хүүхдийг ивээх сангийн суурийн төлөөлөгч гээд энэ чиглэлээр ажилладаг олон улсын төрийн бус байгууллагууд руу албан бичиг явуулж байгаа.  Бид энэ жилийн Үндэсний баяр наадмаас хурдан морины уралдаан зохион байгуулахыг хасуулах тал дээр маш том байр суурьтай байна. Энэ сард гэхэд хоёр хүүхэд хурдан мориноос унаж, нэг нь нас барж, нөгөөх нь чирэгдэж гэмтсэн. Тиймээс энэ тал дээр тодорхой үндэслэлтэй санал зөвлөмжүүд хүргүүлж байгаа. Засгийн газар үнэхээр л хүнээ боддог, хүүхдийн эрхийг дээдэлдэг бол хурдан морины уралдааныг хориглох шийдвэр гаргах хэрэгтэй. Иймээс шүүхэд нэхэмжлэл гаргаад, дуу хоолойгоо илэрхийлээд явж байна.

-Өмнө нь өвөл, хаврын морин уралдааныг хориглох тухай шүүхэд нэхэмжлэл гаргаж ялалт байгуулсан иргэний нийгмийн байгууллагууд одоо хамтран ажиллаж байна уу?

        -Тэр асуудал дээр ажилласан өмгөөлөгч, хуульчид бидэнтэй хамтран ажиллаж байна. Харин иргэний нийгмийн байгууллагууд нь хамтраагүй. Ер нь бид хүүхдийн эрхийг эрсдэлд орсных дараа бус эрсдэлд орохоос өмнө хамгаалж байх хэрэгтэй.

Б.Бадамзул