Хилийн цэргийн 0214 дүгээр ангийн Баянтоорой заставын хугацаат цэргийн алба хаагч байлдагч О.Х харуулын даргаа хөнөөсөн хэрэгт буруутгагдан Говь-Алтай аймагт цагдан хоригдож буй. Түүний ээж Д.Тогтохбаяраас хэргийн явцын талаар тодрууллаа. Тэрбээр “Коронавирусийн халдварын улмаас хөл хорио тогтоосон болохоор хүүтэйгээ уулзаж чадахгүй байна. Утсаар ярьж  ч чадахгүй байгаа. Огтхон ч холбогдоогүй. Бид ер нь хүүгээсээ холбоо тасарсан. Хүүгийн минь гавыг тайлсан эсэхийг мэдэхгүй. Шүүх хурал хэзээ болох нь ч шийдэгдээгүй байна. Хөл хорионы дэглэм сулрахаар бид хүүдээ очих санаатай байна. Сэтгэл санаа ямар өөд байх вэ. Хүүдээ санаа зовоод л байж байна” гэлээ.

Байлдагч Х, М нар өнгөрсөн дөрөвдүгээр сарын 8-ны 18:00 цагийн үед харуулын даргаа хөнөөгөөд зугтсан хэрэг гарсан. Харуулын манаанд явж ирээд, харуулын дарга Г-ийн цээжин тус газарт гурван удаа буудаж, амийг нь хөнөөсөн гэдэг. Буу, сумтай уул руу зугтсан хоёр байлдагчийг дөрөвдүгээр сарын 11-нд баривчилж, Говь-Алтай аймагт цагдан хориод байгаа.