ХӨСҮТ-ийн захирал асан Д.Нямхүүг 2021 оны нэгдүгээр сарын 21-ний өдөр Эрүүл мэндийн сайд асан С.Мөнхсайханы тушаалаар албан тушаалаас нь чөлөөлсөн.

Харин Д.Нямхүү өөрийг нь хууль бусаар ажлаас чөлөөлсөн гэж үзэн буцаан томилуулах хүсэлтийг Сүхбаатар дүүргийн иргэний хэргийн анхан шатны шүүхэд гаргасан байдаг.

Дээрх хүсэлтийг өнөөдөр буюу зургаадугаар сарын 11-ний өдөр хэлэлцлээ. Шүүхээс хариуцагч Монгол Улсын Эрүүл мэндийн яамны итгэмжлэгдсэн төлөөлөгчийн хүсэлт хэлэлцэх үе шатад гаргасан нотлох баримт гаргуулах тухай, өмгөөлөгчтэй шүүх хуралдаанд оролцож шүүх хуралдааныг хойшлуулах тухай хүсэлтүүдийг хангаж 2021 оны зургадугаар сарын 22-ны өдрийн 16:00 цаг хүртэл хойшлуулав.

Ингэснээр уг хурал хоёр дахь удаагаа хойшилж байгаа юм. Эхний хурал өнгөрөгч тавдугаар сарын 27-нд болж, хариуцагч талаас төлөөлөгч нэмж томилсон гэх шалтгаанаар хойшлуулах хүсэлт гаргаад байсан юм.