Шүүгч, прокуроруудтай ажлын бус цагаар уулзаж, хэрэг гацаах, шалгах агуулгатай ялын схем төлөвлөж, их мөнгөний наймаа хийдэг гэгдээд буй Б.Баасанцогттой холбоотой ноцтой баримтууд олон нийтэд ил болсоор байгаа. Үүний нэг нь түүнээс мөнгө авсан гэх 11 шүүгчийн дансны мэдээлэл ил болсон асуудал юм. Тодруулбал, өмгөөлөгч Б.Баасанцогт 2017 оны есдүгээр сараас 2021 оны нэгдүгээр сарын 27-ныг хүртэлх хугацаанд шүүгч, шүүхийн ажилтны данс руу 47.220.000 төгрөг шилжүүлсэн болох нь баримтаар ил болсон. Түүнчлэн Б.Баасанцогтоос мөнгө авсан гэх шүүгчид өөрсдийнх нь мэдээлэл олон нийтэд цацагдсаны дараа “Зээлийн эргэн төлөлт” гэсэн утгаар Б.Баасанцогт руу буцаан шилжүүлэг хийсэн гэх мэдээлэл цацагдаад байгаа юм.

Энэ мэдээлэл олон нийтэд цацагдсаны дараа нэр холбогдсон шүүгчид буюу Баянгол дүүргийн Иргэний хэргийн анхан шатны шүүхийн шүүгч Ж.Эрдэнэчимэг, Хан-Уул дүүргийн Иргэний хэргийн анхан шатны шүүхийн шүүгч Б.Мөнхбаяр, Д.Энхцэцэг, захиргааны ажилтан Э.Дарханцэцэг, Г.Зулаа нар АТГ-т хандаж, Б.Баасанцогттой ашиг сонирхлын байдал үүсгэсэн эсэхийг хуулийн хүрээнд шалгуулахаар өөрсдийн хүсэлтээр өргөдөл гаргасан. Тэгвэл эл хэрэгт нэр холбогдсон нэр бүхий 11 шүүгчийг АТГ-аас шалгаж, эрхийг нь түдгэлзүүлэх асуудал яригдаж эхэлжээ. Өөрөөр хэлбэл, дээрх шүүгчид өмгөөлөгч Б.Баасанцогтоос авлига авч, томоохон хэргүүдийн хувь заяаг шийдэж, ялын схем төлөвлөсөн байж болзошгүй асуудал үүсээд байгаа юм.

Түүнчлэн энэ хэрэгтэй холбоотой ноцтой баримтуудыг дэлгэсний нэг нь Б.Баасанцогт улс төрийн гэмт хэрэгтнүүдийн шүүх хурлыг товлодог байсан гэх зарим баримтыг ил болгосон нь юм.  Энэ төлөвлөгөөнд,

Б.Хурц нарт холбогдох хэргийн талаар “Шүүх хурал 2020 оны зургадугаар сарын 8, шүүх нь таслан сэргийлэх арга хэмжээг өөрчлөх, ингэснээр цагдан хорих, эсхүл шүүхийн харьяалал өөрчлөх, хэрвээ шүүсэн нөхцөлд хэргийг С.Зоригийн хэргийг шинээр илэрсэн нөхцөл байдалд тооцож шийдвэрлэх” гэжээ.

Мөн Ерөнхий сайд асан Ж.Эрдэнэбат “Хар” хэмээх Б.Отгонбаатар нарт холбогдох эрүүгийн хэргийн талаар “Шүүхээр таслан сэргийлэх арга хэмжээг өөрчлүүлэх (Эрсдэл нь улс төр, УИХ-ын гишүүний бүрэн эрх, ач холбогдол нь шүүх хуралдааныг хийх, хариуцлага, шударга ёс), Б.Отгонбаатарын хэргийг тусгаарлаж, гол хэрэгт яллах дүгнэлт үйлдүүлэх, ингэснээр “Эрдэнэт үйлдвэр”-тэй байгуулсан хууль бус гэрээ, мөнгө угаах гэмт хэрэг, шийтгэсэн мэтээр үндсэн хэргийг хааж, замхруулах, хэлбэрийн төдий гэмт хэрэгт ял шийтгэж зөрчилдөөнийг хурцатгах, Ж.Эрдэнэбат, Ганбат, Мандахбат, Түвшинжаргал үлдэх” гэсэн байна.

Түүнчлэн 60 тэрбумын хэргийн тухайд “Мөрдөн байцаалтад буцаасан захирамж бичгээр гараагүй байгаа. Шүүх хэргийг мөрдөн байцаалтад буцаасан, (ингэсний ач холбогдол, цаг хугацааг хэмнэх нь Доржзодовт холбогдох хэргийг хэрэгсэхгүй болгож шийдэх, алдааг засаж яллах дүгнэлт үйлдэж хэргийг шүүхэд өгөх), эсэргүүцэл бичих, хэрвээ давж заалдах шатны шүүх дахин хэлэлцүүлэхээр анхан шат руу буцаах, мөн анхан шатны шүүх эрүүгийн хариуцлага хүлээлгэх гэвэл цаг хугацаа алдана” гэжээ. Энэ мэт зарим хэрэг Б.Баасанцогтын төлөвлөгөөний дагуу явж, зарим нь гацчихаад байгаа аж.

Тэгвэл АТГ-ын Мөрдөн шалгах хэлтсээс 2021 оны гуравдугаар сарын 23-ны өдөр ШЕЗ-ийн дарга Э.Батбаярын нэр дээр 06/3309 дугаар бүхий албан бичиг хүргүүлжээ. Энэ бичигт Эрүүгийн 190200800 дугаартай хэргийг хянан шийдвэрлэхэд шаардлагатай Чингэлтэй дүүргийн Эрүүгийн хэргийн анхан шатны шүүхийн шүүгч Ё.Цогтзандан, Г.Буяннэмэх, Б.Халиун нарыг шүүгчээр томилсон зарлиг, төрийн алба хаагчийн хувийн хэрэг, зан байдлын тодорхойлолтыг Эрүүгийн хэрэг хянан шийдвэрлэх тухай хуулийн 16.6.1-т заасан шаардлагын дагуу хуулбар хувь үнэн болохыг баталгаажуулж ирүүлэхийг хүссэн байна.

ХАВСРАЛТАД:

-Улсын Дээд шүүхийн Эрүүгийн хэргийн танхимын шүүгч Б.Цогт

-Улсын Дээд шүүхийн Эрүүгийн хэргийн танхимын шүүгч С.Соёмбо-Эрдэнэ

-Нийслэлийн Эрүүгийн хэргийн давж заалдах шатны шүүхийн шүүгч Т.Өсөхбаяр

-Нийслэлийн Эрүүгийн хэргийн давж заалдах шатны шүүхийн шүүгч Ц.Оч

-Нийслэлийн Эрүүгийн хэргийн давж заалдах шатны шүүхийн шүүгч М.Алдар

-Нийслэлийн Эрүүгийн хэргийн давж заалдах шатны шүүхийн шүүгч Б.Ариунхишиг

-Чингэлтэй дүүргийн Эрүүгийн хэргийн анхан шатны шүүхийн ерөнхий шүүгч Б.Халиун

-Нийслэл дэх Захиргааны хэргийн анхан шатны шүүхийн шүүгч Ц.Одмаа

-Баянгол, Хан-Уул дүүргийн Иргэний хэргийн анхан шатны шүүхийн шүүгч Б.Мөнхбаяр

-Баянгол, Хан-Уул дүүргийн Иргэний хэргийн анхан шатны шүүхийн шүүгч Д.Энхцэцэг

-Баянгол, Хан-Уул дүүргийн Иргэний хэргийн анхан шатны шүүхийн шүүгч Ж.Эрдэнэчимэг

-Сүхбаатар дүүргийн Эрүүгийн хэргийн анхан шатны шүүхийн шүүгч З.Болдбаатар

-Сүхбаатар дүүргийн Эрүүгийн хэргийн анхан шатны шүүхийн шүүгч Х.Идэр

-Сүхбаатар дүүргийн Эрүүгийн хэргийн анхан шатны шүүхийн шүүгч Д.Дарьсүрэн

-Сүхбаатар дүүргийн Эрүүгийн хэргийн анхан шатны шүүхийн шүүгч Б.Батсайхан

-Булган аймаг дахь сум дундын Эрүүгийн хэргийн анхан шатны шүүхийн шүүгч Д.Отгонбаатар

ШҮҮХИЙН ЗАХИРГААНЫ АЖИЛТАН:

-Баянгол, Хан-Уул дүүргийн Иргэний хэргийн анхан шатны шүүхийн ажилтан Г.Зулаа

-Баянгол, Хан-Уул дүүргийн Иргэний хэргийн анхан шатны шүүхийн ажилтан З.Ууганзаяа

-Баянгол, Хан-Уул дүүргийн Иргэний хэргийн анхан шатны шүүхийн ажилтан Э.Дарханцэцэг

-Улсын Дээд шүүхэд ажиллаж байсан Т.Батдорж

-Улсын Дээд шүүхийн ажилтан Н.Мөнхтулга

-Сүхбаатар, Чингэлтэй дүүргийн Эрүүгийн хэргийн анхан шатны шүүхийн ажилтан Г.Галдандагва нарын нэрийг бичжээ.