Хөл хорио, цар тахал, хандив, тусламж Эрүүл мэндийн яамныханд “Дураараа дургиж, дунд чөмгөөрөө жиргэх” боломжийг бүүрч их олгож байгаа юм биш биз. Хэзээний л өнгөтэй өөдтэй тендерт будлиан үүсгэж, “тэнгэрт хадсан” үнээр эмнэлгийн тоног, төхөөрөмж авах нэрийдлээр халаасаа түнтийлгэдэг эл яамныхны үе дамжсан “урт гар” тасраагүй юм биш үү.

Тодруулбал, Эрүүл мэндийн сайд Т.Мөнхсайхан “Энэ төхөөрөмжийг яаралтай захиалахгүй бол баларна. Төсвийг асуудалгүй гаргуулаад ав” хэмээн коронавирусээр халхавч хийж, хэнд ч хэрэггүй гол нь ажилладаггүй тоног төхөөрөмжийг улсын төсвийн 18 тэрбум төгрөгөөр авсан гэх мэдээлэл сүүлийн хэдэн өдрийн дуулианы нэг байлаа.

Д.Наранбаатар: Ажилладаггүй тоног төхөөрөмжийг 18 тэрбум төгрөгөөр ЭМЯ-нд нийлүүлсэн

 “Оном ” сангийн тэргүүн, доктор Д.Наранбаатар “Эрүүл мэндийн сайд Т.Мөнхсайхан толгойтой ЭМЯ-ын Бодлого, төлөвлөлтийн газрын дарга Р.Оюунханд нарын могой ЭМЯ-нд үүрлэчихсэн байна гэж би харж байгаа. Тэд 18 тэрбум төгрөгөөр ажилладаггүй тоног төхөөрөмжийг ЭМЯ-нд нийлүүлсэн. Энэ нь дэлхийн дундаж үнэнээс зургаа дахин өндөр байгаа юм. Манай эрдэмтдийн баг судалгаа хийж байх явцад Италийн эрдэмтэд “БНСУ-д үйлдвэрлэсэн ... компанийн хийсэн тоног төхөөрөмж, урвалж бодис дээр шинжилгээ хийхэд 70 хувийн мэдрэг чадвартай маш муу үр дүн гаргаж байна” гэж хэлсэн. Бид энэ талаар тэдэнд хэлж, “Яагаад улс орноо бодохгүй, луйвар хийж байгаа юм бэ” гэж асуусан юм. Гэтэл “Оном” сангийн эрдэмтдийг “Эрдэмтдийн зөвлөл”-д  оруулахаас татгалзсан. Өөрөөр хэлбэл, луйвар нь илрэх гээд байсан учраас биднийг хасчихсан гэсэн үг. Ингээд ЭМЯ өдгөө урвалж бодисоо хамгийн үнэтэйгээр хараа хяналтгүйгээр авч байна. ДЭМБ-аас  манай улсад хэрэглэж байгаа оношлуурыг  “Хэрэглэж болохгүй” гэж зөвлөөд байхад 200-300 мянгаар нь татаад авчихсан байна” хэмээн цахим сүлжээнд мэдээлэл хийгээд байгаа юм.   

С.Мөнхсайхан: 18 тэрбумын тоног төхөөрөмж аваагүй

Эрүүл мэндийн сайд С.Мөнхсайхан дээрх мэдээлэлд өчигдөр тайлбар хийсэн юм. Тэрбээр “ДЭМБ-аас зөвшөөрөгдөөгүй оношлуур гэж юу яриад байгааг би ойлгохгүй байна. Одоогийн байдлаар PCR болон түргэвчилсэн оношлуураар шинжилгээ хийж, ДЭМБ-аас өөрсдөө бүртгээд зах зээл дээр хөгжиж буй буурай орнуудад ямар үнээр борлуулах ёстой вэ гэдгийг тогтоочихсон байгаа. Чанарын шаардлага хангаагүй оношлуур ердөөсөө байхгүй. 18 тэрбум төгрөгийн үнэтэй тоног төхөөрөмж худалдаж авсан тохиолдол намайг Эрүүл мэндийн сайд болсноос хойш  гараагүй. Өөрөөр хэлбэл, би 18 тэрбум төгрөгөөр тоног төхөөрөмж аваагүй гэсэн үг. Тэр хүн Дэлхийн банкнаас авсан цахим эрүүл мэндийн программыг ярьсан байх.  2018 онд цахим программын тендерийн хороо байгуулагдаж, 2019 онд энэ хороо өөрчлөгдөөд, худалдан авалтаа зарлаад, 2020 зургадугаар сард шалгаруулалт болсон. Би 2020 оны долдугаар сард Эрүүл мэндийн сайдаар томилогдсон. Үүнтэй намайг холбох ямар ч үндэслэл байхгүй.  Тэр хүнд өөрт нь ямар нэгэн ашиг сонирхол байгаа юм болов уу гэж харж байна. Энэ асуудлаар хууль хяналтын байгууллагад хандаж шалгуулна. Шаардлагатай бол хэнд ч шалгуулахад бэлэн" гэлээ. 

Салбарын сайд нь хэдийгээр ийм мэдээлэл хийж байгаа ч тус яамныхан цар тахлын хэцүү цагийг далимдуулж, эрх мэдэл албан тушаалаа урвуулан ашиглаж, хэнд ч хэрэггүй төмрийг 18 тэрбум төгрөгөөр үнэхээр авчихсан биш байгаа.