-Эрүүгийн цагдаа, ХӨСҮТ-ийн тандалт судалгааны олон байгууллага хэний буруутай үйлдлээс болж, хаана халдвар алдсаныг тогтоохоор ажиллаж байна-

           Халдвар хамгааллын дэглэм байтугай эрүүл мэндийн наад захын шаардлага хангаагүй “Энхсаран” сувилал чухам яаж яваад тусгай зөвшөөрөл авсан, эзэн нь хэн болох талаар мэдээлэл хайсан хүн олон байна. Цар тахлын хэмжээнд хүрсэн коронавирусийн халдвар монголчуудыг дээр дооргүй сандаргаж байгаа энэ цаг үед тус сувиллын удирдлагууд “Усанд хаясан чулуу” мэт таг дуугүй байгаа нь иргэдийг бүр ч бухимдуулж байгаа билээ. Тэгвэл өчигдөр холбогдох хуулийн байгууллагаас “Энхсаран” сувиллын үйл ажиллагааг түр хугацаар зогсоож, эрүүгийн хэрэг үүсгэн шалгаж эхэлсэн. Энэ талаар тус сувиллын ерөнхий захирал О.Түмэнбаяртай холбогдож тодрууллаа.

-Танай сувилалд тусгаарлагдаж байсан ачаа тээврийн жолоочоос халдвар илэрсэн. Мөн цаашлаад танай ажилтнууд халдвар авч, “Энхсаран” сувилал халдварын голомт боллоо гэх хүн олон бий. Энэ талаар та тайлбар өгөхгүй юү?

-Тусгаарлан ажиглах байр гэдэг нь олон байгууллагын хамтарсан үйл ажиллагааны хүрээнд явдаг ажил. УОК, ХӨСҮТ, МХЕГ, ТЕГ, Цагдаа, дотоодын цэрэг гээд олон хамтарсан байгууллага тусгаарлалтын байранд ажиллаж байгаа. Иймд яг одоогийн байдлаар манай сувиллын зөв, буруугийн тухай ярих болоогүй. Эрүүгийн цагдаа, ХӨСҮТ-ийн тандалт судалгааны олон байгууллага хэний буруутай үйлдлээс болж, хаана халдвар алдсаныг тогтоохоор ажиллаж байна. Миний зүгээс дэлгэрэнгүй мэдээлэл өгөх боломжгүй. Миний ярих эрх үүгээр хязгаарлагдсан.

-Танай сувилалд албаныхан хууль хяналтын дагуу ажилласан гэж бодож байна уу?

-Би “Хэн нэгнийг зөв, буруу ажилласан. Тэр нь сайн, тэр нь муу байсан” гэдэг мэдээлэл өгөх боломжгүй. Төрийн байгууллагуудын шийдвэр, дүгнэлтийг сонсох хэрэгтэй. Тэр байгууллагуудын дүгнэлт эцсийн шийд болно гэсэн үг.

-Танай байгууллагад эрүүгийн хэрэг үүсгээд шалгаж байгаа гэсэн?

-Эрүүгийн цагдаагийн албанаас хойшлуулшгүй арга хэмжээ аваад шалгаж байгаа. Хуулийн байгууллагаас манай сувиллыг эрүүгийн хэрэгт татах хууль зүйн үндэслэл байгаа байх. Би яг одоо цагдаа дээр байцаалт өгөх гэж байна.

-Танайхыг тусгай зөвшөөрөлгүй байсан гэдэг мэдээлэл байна. Энэ үнэн үү?

-Манай байгууллага тусгай зөвшөөрөлтэй. Энэ нь ор үндэсгүй, ташаа мэдээлэл байна.

      Тэрбээр өөрийнхөө тухай болон "Энхсаран" сувиллыг ямар хүмүүстэй хамтран эзэмшдэг зэрэг бусад асуудлаар хариулт өгөхөөс татгалзсан юм.