Хан-Уул дүүргийн ИТХ-ын дарга, төлөөлөгчөөр 2016-2020 онд сонгогдон ажилласан долоон эрхэм төрийн мөнгийг хувьдаа завшсан хэрэг гарчээ. Тодруулбал, ИТХ-ын дарга Б.Цэрэн, ИТХ-ын төлөөлөгч Я.Энхбаатар, Ц.Чинзоригт, Ц.Ган-Эрдэнэ, Т.Рэгзэдмаа, Д.Уранцэцэг, Ч.Бат-Оргил нар татвар төлөгчдийн 87 сая төгрөгийг өөрсдийнхөө данс руу буцалтгүй тусламж нэрээр шилжүүлэн авсан байна. Ингэхдээ 2018 оны арванхоёрдугаар сарын 20-нд буюу ганцхан өдрийн дотор 40 сая төгрөгийг орон нутгийн төсвөөс өөрсөд рүүгээ шилжүүлжээ.  

            Хан-Уул дүүргийн ИТХ-ын  дарга Б.Цэрэн, төлөөлөгч Я.Энхбаатар нар л гэхэд 40 сая төгрөгийг өөрсдийн халаасандаа хийсэн бол үлдсэн таван хүн нь 47 сая төгрөг хуваан авсан аж. Тухайлбал, ИТХ-ын төлөөлөгч Ц.Чинзоригт Д.Уранцэцэг, Ч.Бат-Оргил нар нь 2018 оны арванхоёрдугаар сарын 20-нд Хаан банкны дансаараа тус бүр 10 сая төгрөг, Ц.Ган-Эрдэнэ нь 2020 оны гуравдугаар сарын 10-нд долоон сая, Т.Рэгзэдмаа нь 2019 оны хоёрдугаар сарын 19-нд 10 сая төгрөгийг тус тус буцалтгүй тусламж нэрээр өөрсдийнхөө дансанд авсан байна.

            Орон нутгийн төсвөөс буцалтгүй тусламжийг тухайн харьяа орон нутагт амьдарч байгаа иргэдийн амьдрал, ар гэр, эрүүл мэндийн байдал, амьжиргааны түвшин, хөрөнгө, орлого зэргээс шалтгаалан холбогдох дүрэм, журмын дагуу олгодог учиртай. Харин Хан-Уул дүүргийн ИТХ-ын дарга, төлөөлөгч гэх энэ долоон хүн чухам ямар учраас өөрсөд рүүгээ энэ мөнгийг шилжүүлэн авсан нь тодорхойгүй бөгөөд  холбогдох байгууллагууд шалгаж байгаа юм.

            Хан-Уул дүүргийн хэмжээнд орох оронгүй, айлын гэрт толгой хоргоддог, зөвхөн хашаа татаж амьдардаг, худаг хүрэлцээгүйн улмаас 2-3 км газраас усаа зөөдөг, олон хүүхэдтэй өрх толгойлсон эмэгтэй, ажил хийх чадваргүй хөгжлийн бэрхшээлтэй иргэд хэдэн зуу, мянгаараа бий. Гэтэл тэднийг төлөөлж, тэдний төлөө ажиллана гэж сонгогдсон хүмүүс нь эгэл жирийн иргэдэд очих ёстой мөнгийг хумсалж, халаасаа зузаалж суугаа нь яавч байж боломгүй үйлдэл юм. Энэ талаар эх сурвалж "Дарга нар ямар шалтгааны улмаас арав, арван сая төгрөгийг буцалтгүй тусламж нэрээр аваад байгааг гайхаж байна. Буцалтгүй тусламжийн мөнгө Хан-Уул дүүрэгт амьдарч байгаа амьжиргааны түвшин доогуур өрхүүд, ганц бие эмэгтэйчүүд, олон хүүхдүүдээ тэтгэн тэтгэж буй нийгмийн хүнд давхаргад амьдарч буй хүмүүст олгогдох ёстой. Гэтэл Хан-Уул дүүргийн ИТХ-ын дарга, төлөөлөгч энэ мөнгийг өөрсдөө хуваан авч, нэн шаардлагатай хүмүүст өгөөгүй нь гэмт хэргийн шинжтэй үйлдэл. Үүнийг эрх мэдлээ хэтрүүлсэн хууль бус үйлдэл гэж үзэж байна" хэмээн ярилаа.

            Хан-Уул дүүргийн ИТХ-ын дарга, төлөөлөгч эдгээр хүн нь буцалтгүй тусламж авахгүй бол амьдарч чадахааргүй нөхцөл байдалд амьдардаг уу гэвэл үгүй. Хан-Уул дүүргийн ИТХ-ын дарга асан Б.Цэрэнгийн АТГ-т өгсөн хөрөнгө хөрөнгө орлогын мэдүүлгийг л харахад,  2019 онд өөрийн орлого 95 сая, гэр бүлийн орлого 30 сая буюу нийт 125 сая төгрөг гэнэ.  Мөн 72.3 сая төгрөгийн үнэ бүхий нийтийн нэг орон сууц, нэг хашаа, байшинтай, "Акуа", "Камри" гэх хоёр автомашинтай. Түүнчлэн "Эрдэнэс Тавантолгой", "Эрдэнэс МГЛ", "Аньс", "Файн Монголиа", "МХОЦ", "Баянхаан буюу Баянхаан тариа" гэх зургаан компанийн хувь эзэмшдэг. Өөрөөр хэлбэл, яаж ч харсан төрийн мөнгөнөөс буцалтгүй тусламж нэрээр авах хэмжээний амьдралын чадамжгүй нэгэн биш гэсэн үг. Мөн ИТХ-ын даргаар сонгогдсон 2017 оноос хойш түүний хөрөнгө нь хоёр дахин нэмэгдсэн байгаа юм. Өөр бусад зургаан төлөөлөгчийн хувьд ч мөн адил үл хөдлөх болон хөдлөх хэдэн арав, зуун сая төгрөгөөр үнэлэгдэх хөрөнгөтэй хүмүүс байна билээ.

            ИТХ-ын дарга, төлөөлөгч бол тухайн нутаг дэвсгэрт амьдарч байгаа иргэдэд тулгамдаж байгаа асуудлыг шийдэхийн төлөө төрийн анхан шатны байгууллагад иргэдийн олонхын санал авч сонгогдсон хүмүүс. Тэд Засаг даргын үйл ажиллагаа, мөрийн хөтөлбөрийг батлахаас эхлээд хэрэгжих хүртэл үйл явцад хяналт тавихаас гадна шаардлага хангахгүй Засаг даргыг халахад санал оруулах, шинэ хүнийг нэр дэвшүүлэх, төсвийн хөрөнгийг зарцуулах хүртэл эрхтэй. Төрийн анхан шатны байгууллагад төр, түмнээ төлөөлнө хэмээн сонгогдчихоод иргэдийнхээ мөнгөнөөс хумсална гэдэг арай л дэндүү ёс суртахуунгүй үйлдэл биш гэж үү.