Өмнөх

-УИХ-ын гишүүн Б.Бейсэн авлига авсан хэргийн гол зохион байгуулагчаар буруутгагдан шалгагдаж байна-

Баян-Өлгий аймгийн тэргүүн баячуудын тоонд зүй ёсоор ордог нэгэн эр хүртэл группэд буюу тахир дутуугийн тэтгэмжид хамрагдчихсан, сар бүр 480 мянган төгрөг улсаас авдаг юм байна. 200 гаруй сая төгрөгийн үнэтэй автомашин унаж, сүүлийн үеийн брэнд хувцсаар гангарч, эхнэрээ цагаан алт, монетоор гоёчихоод Өлгий хотын төвөөр салхи татуулан давхидаг, эрүүл бие, саруул ухаантай бизнесмэн эрийг Баян-Өлгий аймгийн эмч нар “Хөдөлмөрийн чадвараа 60 гаруй хувиар алдсан, өтгөн, шингэнтэйгээ холилдон, бусдын асаргаа сувилалд хэвтрийн дэглэмд байдаг” гэсэн оноштойгоор  группэд хамруулсан байна.

Түүнийг нь баталж өгсөн аймгийн Нийгмийн даатгалын хэлтсийн  дарга  асаргаа, сувилгааны зардал нэрийн дор нөгөөх баян эрийн эхнэрт нь сар бүр 70 мянган төгрөг олгуулдаг юм байна. Өвчний түүхийг судлаад үзэхээр Баян-Өлгий аймгийн эмч нараас гадна Улаанбаатар хотод ажиллаж байгаа Монголын нэртэй казак үндэстний эмч нар хүртэл өнөөх эрийг эдгэрэшгүй өвчтэй гэдгийг нь баталж, нарийн мэргэжлийн эмч нарын оношилсон бичигтэйгээр хуурамч дүгнэлтэд гарын үсэг зуржээ. Өөрөөр хэлбэл, Баян-Өлгий аймгийн эмч нараас гадна 40 гаруй эмчийн холбогдоод байгаа эрүүгийн хэрэгт Улаанбаатар хот дахь нэр бүхий казак эмч нар ч холбогдох нь гарцаагүй болжээ. Энэ мэт хэргийг цааш нь хөвөрдөөд явахаар эмч нарын ойр дотны хамаатан садан, хувиараа хөдөлмөр эрхэлж, тодорхой хэмжээний орлого олдог хүмүүс халамжийн мөнгийг эмч нарын тусламжтайгаар хайр найргүй, хонхойтол нь авдаг нь тодорхой байна.   

Халамжийн мөнгөөр амьдардаг Баян-Өлгий аймгийнхны башир арга

Хэргийг шалгаж байгаа мөрдөн байцаагч “Баян-Өлгий аймгийнхны халамж авах арга үнэхээр төгсөрчихсөн юм байна. Хуулийн хүрээнд халамж авч болох бүх төрлийн аргыг тэд сүвэгчилж олчихсон байна лээ. Хүүхдүүдээ өндөр настай аав, ээжээрээ овоглож байгаад нас барахаар нь тэжээгчээ алдсаны тэтгэмж авах нь наад захын асуудал. Улирал тутамд олгодог хүнсний талоныг олон мянган айл өрх авдаг. Тус аймгийн ихэнх айл  өндөр настны тэтгэвэр авдаг, хүүхдийн мөнгө, тэжээгчээ алдсаны тэтгэмж, тахир дутуугийн тэтгэмж, цалинтай ээж, “насны хишиг” хөтөлбөр, хүнсний эрхийн бичиг, асаргааны, онцгой тохиолдлын, Алдарт эх, одонтой ээжийн, алдар цолтой ахмад настны, жирэмсэн ээжийн гээд бараг бүх төрлийн тэтгэмж авдаг юм байна.

Ингээд нэг айлын сарын орлого 1.5 сая төгрөгөөс дээш болчихож байгаа юм. Зөвхөн халамжаар амьдраад байхад сарын хэрэглээгээ ямар ч асуудалгүйгээр хангаад байх боломжтой. Тэд ийм л аргаар ажил хийхгүй амьдарч ирсэн байгаа юм. Өөр нэг асуудал нь сургалтын төлбөрийн хөнгөлөлтийг маш олон айл эдэлдэг. Аймгийн удирдах албан тушаал хашиж байгаа дарга нарын хоёроос доошгүй хүүхэд төрийн мөнгөөр их, дээд сургууль төгсдөг юм билээ. Холбогдох бичиг баримтыг цуглуулахдаа нийслэлд байгаа нутгийн зөвлөл, ямар нэгэн албан тушаал хашиж байгаа нутгийнхан нь туслаж дэмждэг юм билээ. Шуудхан хэлэхэд, Баян-Өлгий аймгийнхан нэг бүлэглэл болчихоод улсын төсвийн мөнгийг завшдаг гэсэн үг” хэмээн ярилаа.

500 мянгаас хоёр сая төгрөгийн авлига авдаг байжээ

Албаны өөр нэг эх сурвалжаас авсан мэдээллээр Баян-Өлгий аймгийн 40 гаруй эмч эрүүл хүнийг хэлгүй, дүлий, сэтгэцийн өвчтэй хэмээн хуурамч онош тогтоон, хөдөлмөрийн чадвараа алдсан хэмээн насан туршийн халамжид хамруулахдаа  нэг хүнээс  500 мянгаас хоёр сая төгрөг авсан нь нотлогджээ. 500 гаруй иргэн эмч нарт авлига өгсөн асуудлаар мэдүүлэхдээ эмч нарын дарамтад байнга орж байсан гэдгээ хүлээн зөвшөөчээ. Зарим нь бүр  “Эмч хоёр сая төгрөг хэрэгтэй. Сая төгрөгийг нь бусад эмчид хувааж өгдөг. Үлдсэн нь минийх” гэж хэлдэг байсан. “Группэд оруулж өгнө” гээд мөнгө нэхээд байхаар нь байгаа 300 мянган төгрөгөө аваачиж өгсөн. Тэгсэн өөдөөс уурлаж, “Хэнийг доромжлоод байгаа мал вэ. Чамайг 30 жил сар бүр халамжийн мөнгө авдаг болгох гэж байхад цайны мөнгө өглөө гэж загнаад нүүр рүү шидэж, өрөөнөөс гар, зайл гэж хөөсөн” гэх утга бүхий мэдүүлэг өгсөн байна.

УИХ-ын гишүүнээр хамгаалуулсан эмч нарын бүлэглэл Ховд аймгийн прокурор, шүүхийнхнийг атгаж байна

Баян-Өлгий аймгийн Нийгмийн даатгалын хэлтсийн дарга тэргүүтэй Нэгдсэн эмнэлгийн 40 гаруй эмчийг эрх мэдэл, албан тушаалаа урвуулан ашиглаж, бусдаас авлига авч, хуурамч онош тогтоосон үндэслэлээр, тус аймгийн 514 иргэнийг дээрх хэрэгт холбогдуулан шалгаж байгааг бид өмнө нь мэдээлсэн. Хэрэгт шалгагдаж байгаа эмч нарын дунд 2020 онд УИХ-ын сонгуульд ялалт байгуулсан, Ардчилсан намаас нэр дэвшигч Б.Бейсэн шалгагдаж байгаа аж. Тэрбээр дээрх хэргийн гол зохион байгуулагч байсан гэдгийг эх сурвалж хууль хяналтынханд ч, бидэнд ч хэлж байгаа юм. УИХ-ын гишүүн болохдоо ч “Хөдөлмөрийн чадвараа алдсан” хэмээн хууль зөрчиж, группэд оруулж өгсөн хүмүүсээрээ дамжуулан иргэдийн саналыг авсан байх магадлалтай байгаа гэнэ. Энэ талаар хэрэгт холбогдсон гэрчүүд “Ардчилсан намаас нэр дэвшсэн Б.Бейсэнд саналаа өгөөрэй.

Манай эмнэлэг УИХ-ын гишүүнтэй болох гэж байгаа юм. Гэр бүл, найз нөхдөө ятга. Хэрэв гурваас доош санал өгсөн байвал чи халамжийн группээс хасагдана гэж дарамт, шахалт үзүүлсэн” хэмээн мэдүүлсэн байна. Өөрөөр хэлбэл, төрийн эрхийг хууль бусаар авсан байж болзошгүй нөхцөл байдал бий болоод байгаа ажээ. Авлигын хэрэг нь илэрсэн эмч нар ихэд айж, сандарч байгаа гэнэ. Тэр тусмаа УИХ-ын гишүүнээр сонгогдсон Б.Бейсэн, аймгийн Нийгмийн даатгалын газрын эмч Сакен, Сэрикжан нарын асуудал хүндэрч байгаа ажээ. Мөрдөн байцаах ажиллагаа дууссаны дараа УЕПГ-аас УИХ-д Б.Бейсэний бүрэн эрхийг түдгэлзүүлэх асуудал оруулах бололтой. 

Түүнчлэн авлига ил цагаан авдаг эмч нарын бүлэглэлийн гар хөл Ховд аймгийн хууль хяналтынхны эрх мэдэл бүхий албан тушаалтнуудыг гартаа атгачихжээ. Тодруулбал, харъяалалын дагуу Ховд аймгийн прокурор, шүүхэд сэжиглэгдэж байгаа эмч нарт таслан сэргийлэх арга хэмжээ авахуулахаар АТГ-аас албан ёсоор ханджээ. Харамсалтай нь, Ховд аймгийн анхан шатны шүүхээс тэднийг сулласан аж. Баян-Өлгий аймгийн хууль хяналтынхан ч эмч нарын хэрэгт гар, бие оролцож эхэлсэн гэнэ.

Мөн Ховд аймгийн ерөнхий шүүгчийн төрсөн ах дээрх хэрэгт сэжиглэгдэж байгаа нэгэн эмчийн өмгөөлөгчөөр ажиллаж байгаа гэнэ. Тус өмгөөлөгч эмч нараас өмгөөллийн хөлс гэж их хэмжээний мөнгө авсан тухай эх сурвалж мэдээлж буй. Ховд аймгийн шүүхийн цагдан хорих асуудал хариуцсан шүүгчийн эхнэр нь Баян-Өлгий аймгийн Нийгмийн даатгалын хэлтэст ажилладаг гэх мэтээр эрх ашгийн зөрчил цөөнгүй илэрчээ. Энэ мэт байдлаас шалтгаалж авлига авсан эмч нарыг цагдан хорьж чадахгүй нөхцөл үүсээд байгааг эх сурвалж мэдээллээ.

 Тангараг өргөсөн эмч нар Баян-Өлгий аймагт иргэдийг дарамталж, авлига авч сууна. Энэ бүгдийг таслан зогсоож, ямар нэгэн арга хэмжээ авахгүй бол эрүүл мэндийн салбарын нэр хүнд шороотой хутгалдаж дуусахаар байна. Одоогоор Эрүүл мэндийн сайд Т.Мөнхсайхан энэ асуудалд ямар арга хэмжээ авах нь тодорхойгүй байна.

Үргэлжлэл бий...

Өмнөх

Эрэн сурвалжлах нэгдэл