Үе үеийн Ерөнхийлөгчийн тангаргаа өргөөд хийдэг ажил нь НАМЗХ-ны албан тушаалтнуудыг сольж, хууль шүүх, прокурорын байгууллагын удирдлагуудыг халж, өөрийн хүмүүсээр багаа бүрдүүлэх байдаг.

         Энэ ажил өдгөө жам ёсоороо ид үргэлжилж байна. Нэг хэсэг чимээ сураггүй байсан АТГ-ынхан Ерөнхийлөгчийн  даалгавраар ажилдаа орж, төрийн өндөр албан тушаалтнуудыг дуулиан шуугиантай баривчилж эхэллээ. Тодруулбал, саяхан “ТЭЦ-3”-ийн захирал Ч.Чинбатыг авлигын хэргээр шалгаж эхэлсэн. Түүнийг шалгах гол шалтгаан нь үндэслэлгүйгээр хөрөнгөжсөн байж болзошгүй хэмээн үзсэн байдаг. Тэгвэл АТГ-т шалгуулж эхэлсэн Ч.Чинбат гэж хэн болох талаар мэдээлж байна.

950 САЯ ТӨГРӨГӨӨР ҮНЭЛЭГДЭХ ОРОН СУУЦТАЙ “ТЭЦ-3”-ИЙН ЗАХИРАЛ Ч.ЧИНБАТ ГЭЖ ХЭН БЭ

             Харин АТГ-аас шалгаж эхэлсэн “ТЭЦ-3”-ийн захирал Ч.Чинбат нь  1979 оны арванхоёрдугаар сарын 18-нд Дорнод аймгийн Хэрлэн суманд төрсөн. “Дорнод бүсийн эрчим хүчний систем” ХК-аас ажлын гараагаа эхэлсэн түүхтэй. Тэр сүүлийн дөрвөн жил өндөр албан тушаал хашиж буй. Төрийн албан хаагчийн цалинтай атлаа 950 сая төгрөгийн үнэ бүхий орон сууцтай. Түүний гэр бүлийн орлого 2017 онд 176 сая төгрөг байсан бол 2018 онд 196 сая төгрөг болж өссөн байна. Өөрөөр хэлбэл, Эрчим хүчний хөгжлийн төвийн дарга байхдаа 650 сая төгрөгийн орон сууц, барилга байгууламжтай байсан тэрбээр ердөө ганцхан жилийн дотор 950 сая төгрөгөөр үнэлэгдэх орон сууц, барилга байгууламжтай болжээ. Үүнээс гадна Ч.Чинбат нь “Сэцэнтех” ХХК 13750 ширхэг хувьцаа эзэмшдэг бөгөөд 2017-2018 онд 200 сая гаруй төгрөгийн зээлээ хааж, 191 сая төгрөгийн хадгаламжтай болсон гэдгээ мэдүүлсэн байдаг.

           Ч.Чинбатыг энэ сарын 1-нд АТГ гүйцэтгэх ажиллагааны хүрээнд ажлын байранд нь нэгжлэг хийж, баривчилсан. Учир нь, Эрчим хүчний яамны харьяа зарим байгууллагын удирдлагууд их хэмжээний төсөвт өртөг бүхий тендер сонгон шалгаруулахдаа бүрэн эрх, албан тушаалын байдлаа урвуулан ашигласан гэх мэдээлэл Авлигатай тэмцэх газар иржээ. Дээрх мэдээллийн дагуу хяналт, шалгалт явуулахад тендерт оролцсон аж ахуйн нэгжүүдийг зориудаар хасаж, өөрийн танил тал, хамаарал бүхий этгээд буюу аж ахуйн нэгжид давуу байдал олгосон, тендерийг өрсөлдөгчгүй олгож, шууд гэрээ байгуулсан байж болзошгүй зэрэг зөрчил илэрсэн гэдэг. Тиймээс Захирал Ч.Чинбатыг их хэмжээний авлига авсан байж болзошгүй хэмээн үзэж, гүйцэтгэх ажиллагаа явуулан баривчилсан билээ.

        АТГ-ынхны дараагийн “бай” Нийслэлийн прокурорын газрын дарга асан Ш.Нямдорж болов. Тодруулбал, түүнийг авлига, албан тушаалын хэрэгт холбогдуулан шалгаж, өчигдрөөс  гэрт нь АТГ-аас нэгжлэг хийж эхэллээ. Өнгөрөгч гуравдугаар сараас эхлэн түүнтэй холбоотой асуудлыг хэвлэл мэдээллийн хэрэгслүүд нийтэлж, Нийслэлийн прокурорын газраас албан тушаалыг нь бууруулах хүртэл арга хэмжээ авсан удаатай. Ардчилсан намын дарга асан С.Эрдэнэ хэлэхдээ "Ерөнхийлөгч Х.Баттулга надтай хэрэг наймаалцсан. Надад миний хийгээгүй хоёр хэрэг үүсгэсэн.

          Гэвч тэрхүү хэргийг Ц.Насанбат хэрэгсэхгүй болгож, Нийслэлийн Ерөнхий прокурор Ш.Нямдорж сэргээсэн. Тиймээс хууль, шүүхийнхэн Ерөнхийлөгч Х.Баттулгаас тушаал авч ажилладгийн нотолгоо" гэж мэдэгдсэн байдаг. Тиймээс тус мэдэгдлийн дараахан буюу өнгөрөгч гуравдугаар сарын 29-нд Нийслэлийн прокурорын газрын дарга асан Ш.Нямдоржийг Баянзүрх дүүргийн прокурор болгон тушаал бууруулж, Нийслэлийн прокурор Ц.Насанбатыг үүрэгт ажлаас нь түдгэлзүүлсэн юм.

НИЙСЛЭЛИЙН ПРОКУРОРЫН ДАРГА АСАН Ш.НЯМДОРЖ ГЭЖ ХЭН БЭ

          Нийслэлийн прокурорын газрын Ерөнхий прокурор, хууль цаазын тэргүүн зөвлөх Д.Баярмагнай өөрийн хүсэлтээр өнгөрсөн дөрөвдүгээр сард  үүрэгт ажлаасаа чөлөөлөгдсөн. Тэгвэл хагас жил орчим хугацаанд эзэнгүй байсан Нийслэлийн прокурорын газрын Ерөнхий прокурорыг томилсон. Тодруулбал, НПГ-ын Ерөнхий прокуророор 2017 онд нийслэлийн хяналтын прокурор, 2018 онд ахлах прокурорын албан хашиж байсан Ш.Нямдоржийг томилсон байна. Түүнийг Улсын Ерөнхий прокурор Б.Жаргалсайханы тушаалаар томилсон гэдэг. Тэр цагаас хойш түүнийг улстөрийнхөн Х.Баттулгын хүн гэж ярьдаг.

АТГ-Т ШАЛГУУЛАХ ДАРААГИЙН ХҮН ХЭН БЭ

           Энэ мэтчилэн АТГ-ынхан ажилдаа орж, зарим нэр бүхий албан тушаалтны хэргийг дуулиан шуугиантай зарлаж, эхнээс нь нийтэд ил болгож эхэллээ. Энэ үед “Эрдэнэт үйлдвэр”-ийн мөнгөөр охиныхоо сургалтын төлбөр болох 100 гаруй сая төгрөгийг төлүүлсэн, 200 гаруй сая төгрөгөөр хувийн орон сууцаа тохижуулсан, хагас тэрбумын үнэтэй автомашин, мөнгөн аяга, массажны сандал, уран зураг худалдаж авсан зэрэг хэдэн тэрбумаар тоологдох хөрөнгө хувьдаа “завшсан” “Эрдэнэт үйлдвэр” ТӨҮГ-ын Ерөнхий  захирал Х.Бадамсүрэнд хэзээ хариуцлага тооцож, АТГ-аас шалгах нь тодорхойгүй байна.