Монгол Улсын Ерөнхий сайд асан С.Баяр, Сангийн сайд асан С.Баярцогт нарт холбогдох шүүх хурадаан нийслэлийн Давж заалдах шатны шүүхэд эхэлсэн. Өмнө нь тэдний хэргийг хамтад шалгаж байгаад өнгөрсөн долоодугаар сарын 6-ны өдөр салгаж хянахаар болсон. Тодруулбал, С.Баяр, Ч.Давааням нарт холбогдох эрүүгийн хэрэг, С.Баярцогт, Б.Ариунсан, Б.Бямбасайхан, Б.Бадрал, Д.Ганболд нарт холбогдох эрүүгийн хэрэг хэмээн тусгаарласан. Харин арванхоёрдугаар сарын 1-нд С.Баяр, Ч.Давааням нарт холбогдох эрүүгийн хэргийн Давж заалдах шатны шүүх хурлаар С.Баярцогт нарт холбогдох эрүүгийн хэрэгтэй нэгтгэн хэлэлцүүлж, шийдэх шүүгчийн тогтоол гарсан юм. Харин өнөөдрийн шүүх хуралдаанаар  тэдний хэргийг салгаж, хянах нь зүйтэй гэж шүүхээс үзжээ. Өөрөөр хэлбэл, хоёр хоногийн өмнө гасан шүүгчийн тогтоол хүчингүй болсон гэсэн үг. Одоогийн байдлаар С.Баярцогтыг үргэлжлүүлэн шүүж байгаа бөгөөд С.Баярын хэргийг хойшлуулсан байна. 

Хэргийг эргэн сануулахад, Чингэлтэй дүүргийн анхан шатны шүүхээс С.Баярт нийтийн албанд ажиллах эрхийг хоёр жилээр хасч, нийт таван жил хорих ял, Ч.Даваанямд хоёр жил хорих ял тус тус оноосон юм. Харин Чингэлтэй дүүргийн Эрүүгийн хэргийн анхан шатны шүүхээс С.Баярцогтод 10 жил хорих, нийтийн албанд томилогдох эрхийг таван жил хасах, гурван байрыг улсын орлого болгох, 1.6 тэрбум төгрөг хураах ял оноосон. Мөн Б.Бямбасайхан, Д.Ганболд нарт нийтийн албанд томилогдох эрхийг тус бүр гурван жилээр хасаж, дөрвөн жил хорих ял, Б.Ариунсан, Б.Бадрал нарт нийтийн албанд томилогдох эрхийг хоёр жил хасаж, 1.6 жил хорих ял тус тус ногдуулаад байгаа юм.