Нийслэлийн Хан-Уул дүүргийн XI хорооны нутаг дэвсгэрт орших “Инэл зайсан” хотхоны замд 76-67 УБУ улсын дугаартай “Мерседес Бенз” загварын автомашин хоёр автомашиныг мөргөж, тус автомашины жолооч Д болон бусад нь иргэдийн амар тайван байдлыг алдагдуулж, танхайрсан тухай дүрс бичлэг цахим сүлжээнд цацагдсан. Тус хэрэг нь өнгөрсөн оны есдүгээр сарын 1-2-нд шилжих шөнө болсон бөгөөд иргэн Д нь 76-67 УБУ улсын дугаартай автомашинаар “Лексус-250”, “Приус-20”загварын автомашиныг мөргөж, осол гаргасан тухайн хотхоны дотор бие засаж, бусад рүү “Сайдын хүүхэд байна” хэмээн танхайрсан байдаг.

Тэгвэл зам тээврийн осол гаргаж, жолоодох эрхгүй, согтууруулах ундаа хэрэглэсэн үедээ тээврийн хэрэгсэл жолоодож, бусдын амар тайван байдал алдагдуулж, танхайрсан Д-ын зөрчлийг хэргийг Хан-Уул дүүргийн Эрүүгийн хэргийн анхан шатны шүүхэд хэлэлцэж, Зөрчлийн тухай хуулийн 14.7 дугаар зүйл зааснаар 30 хоногийн хугацаатай баривчилсан байна.