• Өнөөдөр 2024-03-29

ГАРТАА БАЙГАА БАРИМТАА ТӨРИЙН ОРДОНД БИШ, ТҮМНИЙ ӨМНӨ ЗАРЛА, Т.ДОРЖХАНД ГИШҮҮН ЭЭ

2022-12-09,   1442

                 УИХ-ын гишүүн Т.Доржханд өнгөрөгч буюу энэ сарын 8-ны Чуулганы нэгдсэн хурлын үеэр “Газрын тос, нүүрс, зэс алтнаас орлого орж ирдэггүй, хилийн цаана үлддэг асуудал түгээмэл болчихсон. Үүнтэй холбоотойгоор би шүгэл үлээсэн нь үнэн. Засгийн газар мэдэгдлээ хийсэн нь үнэн. Эрх баригчид 40 их наяд гэж юу яриад байна вэ. Уучлал гуй ч гэж байх шиг. Үүнийг нь АН-ын Б.Пүрэвдорж гишүүн дэмжээд 9000 мянган хүнтэйгээ жагсана ч гэж байх шиг. АН-ынхан ХҮН нам бидний орон зайг эзлэх гээд байна гэдгээ больчих хэрэгтэй байна. Г.Ганболд дарга аа, та тоогоо өгөхдөө 6,4 сая байна гэдгийг хэлээд тохироод явсан. Одоо 2,3 болчихсон байна. Тэгвэл хэн хэзээ үүнийг гаргаж ирсэн бэ. Би тооцооллыг нь гаргаж ирсэн үнэн. 40-45 их наяд төгрөгийн орлогыг алдчихаад байгаа нь үнэн. Би нотолж чадна. Гуйвуулсан юм байхгүй" гэх ноцтой мэдэгдэл хийсэн. Ард түмнийг төр засагтай нь хоёр талцуулаад буй энэхүү мэдэгдлээ тэр нотолж, баримтаа дэлгэх цаг нь болоогүй юу. Аль эсвэл Чуулганы индэр дээрээс өмнөх шигээ зүгээр л попорчихов уу. 

           Нэг талаас харахад, нэр бүхий эрх мэдэл, албан тушаалтнууд нүүрсний хулгайн хэрэгт холбогдсоныг гадарласан УИХ-ын гишүүн Т.Доржханд түүгээрээ түрий барьж, Төрийн ордонд саагиж байна уу гэлтэй. Юм л бол “Нүүрсний хулгайн хэрэгт холбогдох албан тушаалтнуудын нэрс надад байна. Би нотолж чадна” хэмээгээд байгаа нь иргэдийн анхаарлыг өөртөө хандуулах, ХҮН-аас бусад нам авлига, албан тушаал, эрх мэдэлд худалдагдсан мэт харагдуулахыг оролдож буй оролдлогуудынх нь нэг байхыг үгүйсгэх аргагүй. Хэрвээ түүнд баримт үнэхээр байгаа бол тэр аль хэдийнэ Төв талбайд жагсагч олны дунд гарч ирээд нэрсийн жагсаалтыг уншчихсан байх ёстой. Түүний характер тийм хэмжээнийх шүү дээ. Дээр нь иргэд тавын таван өдөр сууж байгаа Төрийн ордных нь урд талбайд, ийм ойрхон жагсаж байхад шүү дээ. Тэгэхэд тэр цонхны цаанаас чихэр долоолгож байгаа аятай "Надад баримтууд бий. Гэхдээ би хэлэх болоогүй" гэсэн зүйл яриад сууж байгаа нь цаанаа өөрөө ч улс төрийн тоглоомонд "орооцолдсон" байх магадлалтайн илрэл байж мэднэ. 

          Т.Доржхандыг Ерөнхийлөгч асан Ц.Элбэгдоржийн хүн гэдэг. Энэ ч утгаараа өдгөө зургаа дахь өдрөө үргэлжилж буй жагсаалыг Ц.Элбэгдорж тэргүүтэй хууччуул ихээхэн дэмжиж, зарим үед шаардлагатай хүчээр турхирч байж ч мэднэ гэх хүн цөөнгүй байна. Энэ өнцгөөр бол Т.Доржхандыг санхүүжүүлэгч, улс төрд "хөтлөгч"-д гудамжин дахь жагсаалыг дээд цэгт нь хүртэл өдөөн, ард иргэдийн уур бухимдлыг хатгаж суухад ганцхан хананы цаана Т.Доржханд "Надад баримт байна, гэхдээ хэлэх болоогүй" хэмээн хээв нэг сууж байгаа гэсэн үг. Мэдээж энэ таамаг үнэн бол тэд ард түмнээр, монголчуудаар дэндүү муухай даажигнаж байна гэсэн үг. 

        Нөгөө талаар түүнд нүүрсний хулгайн хэрэгтэй холбоотой эрх мэдэлтнүүдийн нэрс байгаа л бол тэр ийн хийрхэж суух хэрэг юун. Хүйтэн жаварт жиндэн зогсоо иргэдийнхээ өмнө гарч ирээд эх орныхоо баялгийг ичих нүүргүйгээр хумсалсан этгээдүүдийн нэрсийг зарлах нь түүнд улс төрд шинэ хүний үүднээс бүх талаар ашигтай. Гэвч тэр тавын таван өдөр зарласангүй. Тиймээс түүнд ямар ч баримт байхгүй. Эс бөгөөс тэр хэн нэгэн эрх мэдэл, албан тушаал, тойрог амлан өндөр үнээр худалдаж авахыг нь, улам бүр үнэд орохыг нь хүлээн улсаар нь ийн шантаажилж суугаагаас зайлахгүй. Тийм бол улс төрийн карьерын чинь төгсгөл энэ байх нь дамжиггүй. Учир нь, УИХ-ын гишүүн Т.Доржханд биш юмаа гэхэд Долгор, Доржийн хэн нэг нь тэр нэрсийг олон нийтэд задалж байж л Төв талбайд хурсан жагсаал намжихаар болчихлоо.

        Өөрөөр хэлбэл, өдөр ирэх, цаг явах тусам тэр жагсаалт, баримт үнэ цэнтэй бас үнэ цэнгүй болж байгааг хэн хүнгүй мэднэ. Үнэ цэнтэйгээ хүрвэл Монгол Улсын төрийн засаглалын тогтвортой байдлыг нэг удаа ч гэсэн аварч үлдэх жагсаалт болно. Үнэ цэнгүйгээ хүрвэл мянга зарлалаа ч иргэд ч тоохгүй, Засагт ч хэрэггүй цаас болж хувирна. Иймд жагсаалт, баримт байхгүй бол бүү попор, улсаар нь даажигна. Даажигнах, попрох, улстөржих цаг ч одоо биш. Харин байгаа бол илүү дутуу заль, олз хүлээхгүйгээр задлах нь юу юунаас илүү ашиг авчрахыг юу эс андах. 


ГАРТАА БАЙГАА БАРИМТАА ТӨРИЙН ОРДОНД БИШ, ТҮМНИЙ ӨМНӨ ЗАРЛА, Т.ДОРЖХАНД ГИШҮҮН ЭЭ
АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.

Нийт сэтгэгдэл: 1
  • Сэтгэгдэл үлдээсэн: 2022-12-09 08:53:34
    4: Нүүрсчид сандралдаад эхэлж
Шинэ мэдээ
Нийтлэлчид
Монгол Улс, Улаанбаатар хот, Сүхбаатар дүүрэг, VIII хороо, "Ардын эрх"-ийн байр, Гуравдугаар давхарт Эргэлт.мн редакц
7509-1188