Охид бүсгүйчүүд эд бараа шиг худалдагдаж, бэлгийн мөлжлөгт өртдөг явдал хаа сайгүй гарах боллоо. Энэ төрлийн гэмт хэрэг нь улс төр, хууль хяналт, бизнес гэх мэт томоохон мафийн сүлжээг бий болгож, нийгэмд байдаг үзэгдэл мэт ойлгогддог болох нь. Тэд өндөр цалинтай ажлын санал амлах, их сургуульд сургана гэх зэргээр амьдралын хүнд нөхцөл дээр нь дөрөөлөн ятгах, хүч хэрэглэх замаар охид, бүсгүйчүүдийг аргагүй байдалд оруулан цааш худалддаг гэх. Тэднийг ихэвчлэн Хятад, Малайз, Макао, Хонконг зэрэг оронд биеийг нь үнэлүүлж ашиг олдог гэдгийг хэд хэдэн баримтаас харж болно. Итгэл найдвар тээж, аав ээждээ сайн сайхныг амлаад гэрээсээ гарсан охид хил гараад л сураг тасарна. Ингээд дааж, тэвчихийн аргагүй хүчирхийллийн золиос болж, өдөр хоногийг яргалал дунд өнгөрүүлэх нь харамсалтай. Тэгвэл бид хүний наймааны золиос болж, бие махбод, эрүүл мэндээрээ хохирч байгаа цөөн хэдэн жишээг эргэн сануулъя

          Монгол Улсад 2003 онд буюу хамгийн анх БНХАУ-ын иргэн Лю И гэх эмэгтэй бусдын биеийг үнэлүүлэх, хил давуулан наймаалцах зорилгоор ирж, гэмт хэрэг үйлдэж байгаад хууль хяналтын байгууллагаар шалгагдаж байсан түүхтэй. Үүнээс хойш хүний наймаа гэх гэмт хэрэг Монголчуудын чихэнд дөнгөж хүрч эхэлжээ. Гэтэл өнөөгийн байдлаар хүн худалдаалах гэмт хэргийн золиос болсон монгол охидын тоо жил тутамд нэмэгдсээр байна. Тэр бүү хэл хүний наймаачид Монголд ирээд хэд хэдэн охидыг хил давуулаад амжсан байна. 

МОНГОЛ УЛСЫН ТАВАН ИРГЭНИЙГ ГАДААД РУУ ХУДАЛДСАН, ХҮНИЙ НАЙМААЧИН СИНГАПУР УЛСЫН ИРГЭН LOH SIEN CHI

           Гадаадын иргэд аяллын виз мэдүүлэн Монголыг зорьж ирээд, аялах нь битгий хэл цэцэг цэврүү шиг охидыг хүчээр биеийг нь үнэлүүлж, зовлонд унагаах нь энгийн л нэгэн үзэгдэл болж. Энэ байтугай эх нутагт нь наймаалцаж байгаад, удалгүй хил давуулж зардаг гэмт хэрэгтнүүд хүний амьдралыг шоглоом болгож орхижээ. 

          Саяхан илчлэгдсэн хэргийг сөхвөл “Монгол Улсын охид, эмэгтэйчүүдтэй бэлгийн харьцаанд орж, хүн худалдаалах гэмт хэрэг үйлдсэн байж болзошгүй Сингапур Улсын иргэнийг Баянгол дүүрэгт үйл ажиллагаа явуулдаг нэр бүхий зочид буудлаас дайчлан баривчилсан байдаг. Тодруулбал, 64 настай Сингапур Улсын иргэн нь 2013 оноос эхлэн Монгол-Сингапур Улсын хооронд аялал жуулчлалын визээр зорчдог байсан. Монгол Улсад байх хугацаандаа эмэгтэйчүүдийг зуучилж, бэлгийн хүчирхийлэлд оруулах, хувь хүний нууцтай холбоотой дүрс бичлэг, гэрэл зургийг нь авч, хувь хохирогчдыг айлган сүрдүүлдэг, гадаад улсын иргэнтэй үгсэн тохиролцож охид биеийг нь үнэлүүлэх, бэлгийн мөлжлөгийн хохирогч болгон хүн худалдаалах гэмт хэрэг үйлдсэн байж болзошгүй нөхцөл байдал нь тогтоогдсон. Одоогийн байдлаар 130 гаруй охид, эмэгтэйчүүдтэй фэйсбүүк, инстаграммаар харилцаж, гадаад улс руу зохион байгуулалттайгаар хил дамнуулан таван эмэгтэйг худалдаалсан байж болзошгүй нөхцөл урьдчилсан байдлаар тогтоогдож, мөрдөн шалгах ажиллагааг үргэлжлүүлсэн байна. Гэхдээ хохирогчдын тоо үүнээс ч олон болж байгааг эх сурвалж мэдээлж байсан юм. Эрүүгийн цагдаагийн албанаас Сингапур Улсын иргэнийг дайчлан баривчилж, цагдан хорьсон. Loh Sien Chi гэх Сингапур Улсын иргэн нь Баянгол дүүргийн дөрөвдүгээр хороолол, “Батхүлэг” товерын хоёр, дөрөвдүгээр давхарт байрлах “BKH” зочид буудалд байрлаад нэг хонож байхдаа баригдсан" гэх тайлбарыг хийгээд байгаа. 2013 оноос хойш  буюу есөн жил Монголоос Сингапурын хооронд зорчиж байхдаа монгол охидыг бэлгийн хүчирхийллийн хохирогч болгож, өөрийнхөө болон бусдын бах тавыг хангаж ирсэн балмад иргэнийг хууль хяналтынхан сая нэг цагдан хорьж, хариуцлага нэхэх үгүй дээрээ тулаад байна. 

МЬЯНМАР УЛСАД МОНГОЛ ИРГЭД ХҮНИЙ НАЙМААНЫ ХОХИРОГЧ БОЛЖЭЭ

         Цар тахлын хоёр жилийн хугацаанд улс орнууд хилийн хязгаарлалт тавьж, хил дагасан худалдаа наймаа түр гацаанд ороод байсан юм. Түүнчлэн хүний наймааны хэрэг илрэх нь ч хэсэг намжсан. 

        Гэтэл цар тахлын хөл хорио тавигдсантай холбоотой Зүүн Өмнөд Азийн орнуудад 20-35 насны залуучууд хүн худалдаалах гэмт хэрэгт өртөж, амь нас, эрүүл мэндээрээ хохирох явдал нэмэгдсэн байна. Зүүн Өмнөд Азийн  орнуудад гэмт хэргийн золиос болсон иргэдийн дунд монгол иргэд бүртгэгджээ. Тухайлбал, дотоод мөргөлдөөний улмаас газар нутгийн зарим хэсэг нь зэвсэгт босогчдын мэдэлд ороод байсан Мьянмар улсын "КП парк" гэх газар Монгол Улсын тодорхой тооны иргэд хохирогч болсон нь тогтоогдоод байгаа юм. Хэрэг илэрсэн тус паркт цахим луйвар, биеэ үнэлэлт, хөдөлмөрийн мөлжлөг болон мансууруулах бодисын хууль бус худалдаа зохион байгуулдаг талаар хил залгаа орнуудын хууль сахиулах байгууллагаас анхааруулж, өөрийн иргэдээ гэмт хэрэгт өртөхөөс урьдчилан сэргийлж эхэлсэн. Дээрх гэмт хэргийг хэрэгжүүлэхдээ цахим орчинд англи, хятад хэлний орчуулагч, хүний нөөцийн мэргэжилтэн, оператор зэрэг ажилд өндөр цалин, хангамж амласан худал зар, мэдээлэл оруулж, иргэдийг хууран мэхэлж авчирчээ. Улмаар онгоцны тасалбар, даатгал, зочид буудал, хоолны зардлыг хариуцсан нэрээр өрийн дарамтад оруулан хүч хэрэглэх, айлган сүрдүүлэх замаар цэрэгжсэн хамгаалалт дор албадан хөдөлмөр эрхлүүлдэг байна. Хохирогчид бусдын хүчинд автан, тус бүсэд шинээр хүн олж авчрах, зуучлах ажлыг гүйцэтгэж байгаа нь нөхцөл байдлыг улам хүндрүүлжээ.

       Гадаадын хууль сахиулах байгууллагаас "КП парк"-д хоригдож, албадан хөдөлмөр эрхэлж буй иргэдээ чөлөөлж, эх оронд нь буцаах ажиллагааг тасралтгүй хэрэгжүүлж байгаа боловч тухайн бүс нь зэвсэгт босогчдын мэдэлд байгаа тул энэ ажил удаашралтай байгаа аж. Гэвч манай улсаас уг хэргийн хохирогчид болсон монгол иргэдийг хэрхэн эх оронд нь буцааж авчрах тухай тодорхой шийдэлд хүрээгүй л явна. Цаг хугацаа өнгөрөх тусам харгис иргэдийн гарт амь тэмцэж, бие махбодийн хүнд ялд унасан эдгээр иргэд “Хэзээ биднийг аврахаар ирэх бол” гээд дотроо шаналж суугаа. Гэвч энэ бол нэгэнт ил болсон хэрэг учир Олон Улсын хүний эрхийн байгууллагууд хүч нэгтгэн хүнээ хүний гараас аврана гэдэгт найдаж сууна. 

        Улс орон даяараа эрэн сурвалжилж, гашуудан суугаад ч алгын чинээ охиныг олж чадаагүй харамсалтай хэрэг болоод өнөөдөр бараг мартагдаж байна. Тухайлбал, Монгол орны урд хэсгийг дамжин өнгөрөх томоохон суурин Дорноговь аймгийн Замын-Үүд сумын Ерөнхий боловсролын II сургуулийн гуравдугаар ангийн сурагч, найман настай  охин 2017 оны арваннэгдүгээр сарын 2-ны өдөр ор сураггүй алга болсон. Өөрөөр хэлбэл, охин сураггүй болоод гурван жил 21 хонож байна. Охиныг Д.Сэржмядаг гэдэг Цагдаагийн байгууллагаас уг хэрэгт мөрдөн шалгах ажиллагааг тасралтгүй явуулсан боловч одоог хүртэл Д.Сэржмядаг охин олдоогүй. Эрэн хайх ажиллагаанд цагдаагийн хэлтэс, онцгой байдлын хэлтэс, төрийн болон төрийн бус байгууллага, иргэдийн төлөөллөөс бүрдсэн, давхардсан тоогоор нийт 1200 гаруй алба хаагч, ажилтан, иргэд, албаны эрэлч нохой, давхардсан тоогоор 118 тээврийн хэрэгсэлтэй Замын-Үүд сумыг бүхэлд нь нэгжжээ. Ингэхдээ I,II,III,IV,V  багийн нутаг дэвсгэрт үйл ажиллагаа явуулж буй 24 байгууллага, 214 аж ахуйн нэгж, 4947 айл өрхөөр нэг бүрчлэн орж шалган, тус суманд шинээр баригдаж байгаа, бүрэн дуусаагүй, бүрэн дууссан боловч ашиглалтад ороогүй 47 айлын орон сууц, 445 траншей, бохир усны нүхийг шалгаж, сумын нэгдсэн ус цэвэрлэх байгууламжийн усыг шүүж ёроолыг нь шалган, байшингийн дээврийн хонгил, байшин, хувийн сууцандаа подвал, зоорьтой 174 объектод үзлэг шалгалт хийж гүйцэтгэсэн байна. Мөн охиныг хил давуулсан байж болзошгүй гэх таамаглал гарсан ч өнөөдрийг хүртэл тодорхойгүй байгаа билээ.

          Энэ мэтээр монгол охид эл далдаар хүний наймааны золиос болсоор байх уу Х.Нямбаатар сайд аа.