-УРЛАГИЙНХАН ХАР ТАМХИЙГ МОНГОЛД ДЭЛГЭРҮҮЛЖ,  ПИРАМИД СҮЛЖЭЭ ҮҮСГЭЖ БАЙНА-

        Хар тамхи Монголын нийгэмд бодит аюул, занал учруулах болсоор нэлээд жилийн нүүрийг үзлээ. Саяхан л бид мансууруулах бодисыг Монголчуудаас алс хол, зах зээл ч байхгүй гэж төөрөгдөж явах зуур өсвөр үе, залуус энэ төрлийн гэмт хэргийн золиос болж, статистикийн муруй өдөр бүр дээшилсээр байна. Ялангуяа өвсөнд мансуурсан урлагийнхан хар тамхинд өөрсдийгөө дүрж, ял сонсох боловч, ээлж нэгээр өршөөгдөж суллагдсаар сүүлдээ “Нүүр өгөхөөр, бөгс өгнө” гэдэг шиг болж байна.

         Хар тамхинд хөл алдсан олны танил эрхмүүдээс дурдвал Оросын холбооны Улсын Буриад Улсын гавьяат жүжигчин Б.Амархүү нь 2019 оны есдүгээр сард хар тамхи хэрэглэж, хадгалсан нь тогтоогдсоны улмаас хоёр жилийн хорих ял авсан ч удалгүй батлан даалтад гаргасан. Дэлхийд хар тамхины хэрэгт холбогдсон гэмт хэрэгтнүүдийг батлан даалтад гаргах нь битгий хэл хоёр жилээр хориод ч дуусахгүй. Гэтэл Б.Амархүүгийн шуугиант энэ явдлаас сургамж авах хүн алга бололтой. Б.Амархүүтэй нэг тогооноос хоолоо олж иддэг “Мотив” хамтлагийн дуучин Б.Эрдэнэбаяр буюу Жижгээ мөс хэрэглэж байгаад саатуулагдаж, хилээр гарахыг нь хориглоод байсан юм. Уг нь прокурор түүнийг цагдан хорих, таслан сэргийлэх арга хэмжээ авах санал гаргасан ч суллаж орхисон нь асар их хэл ам дагуулж байлаа. Мөн дуучин  Ц.Эрдэнэбаяр өмнө нь 2018 онд хар тамхи хэрэглэж, зургаан сарын хугацаанд саатуулагдаж байсан удаатай нэгэн гэх. Энэ явдлаас хойш тэд “Ийм үйлдэл гаргасандаа харамсдаг. Дахиж ингэхгүй” гэх мэт ард түмэндээ эрхлэн, өрөвдүүлж хожуу ухаарсан байдаг. Түүгээр ч зогсохгүй хэд, хэдэн удаа тайзан дээр гараад амжсан. 

-УРЛАГИЙНХНЫ  ХАР ТАМХИНЫ ТҮҮХ ЭРТНЭЭС УЛБААТАЙ-

           Хар тамхины хэргээр “Харанга” хамтлагийн дуучин Х.Лхагвасүрэн хэдэн жилийн өмнө нэр холбогдож, 10 жилийн ял сонссон ч Ерөнхийлөгч өршөөл үзүүлж, түүнийг сулласан. Урлагийн ах нар эртнээс дүү нартаа ийм үлгэрлэл үзүүлсээр иржээ. Tэгвэл дуучин Т.Дэлгэрмөрөн ч бас хар тамхины хэрэгт холбогдож байсан ба Б.Амархүүг хоригдож байхад ухаарсан ахын хувьд үнэт зөвлөгөөг өгч байлаа. 

        Мөн Монголын хип хопын томоохон төлөөлөл, өсвөр үе, залуусд дуу хоолойгоо хүргэсээр ирсэн “Ice top” хамтлагийн Д.Манлайбаатар, “Guys” хамтлагийн дуучин Х.Бат-Ундрал, реппер Don Dior тэргүүтнүүд нэр холбогдон шалгагдаж байж. Хар тамхитай холбогдсон цагаасаа муу нэрээрээ залуусд дуу хоолойгоо хүргэх болжээ. Гэвч тэд бас л ах нарын нэгэн адил тэнсэн харгалзах ял авч байсан юм. Монголын Хип Хоп холбооны Ерөнхийлөгч “Баавар” буюу Ш.Батбаяр хар тамхины хэрэгт холбогдон шалгагдаж бас л дуулиан тарьж байв. Хип, хопчид энэ мэт гэмт хэрэгт холбогдож өршөөгдөн суллагдсаар л байлаа. Гэвч тэдэнд эргээд тайзанд гарах ичих нүүр байсаар л байна. 2018 онд дуучин Эгшиглэн, Коби нар мансууруулах эм, сэтгэцэд нөлөөт бодисыг хууль бусаар ашигласан хэрэгт гэм буруутайг тогтоож, нэг жил нээлттэй хорих ял оноосон. Харин Эгшиглэн буюу Т.Болортуяа нь тухайн үед С.Чулуунбаяртай хамт байсан ч мансууруулах эм, сэтгэцэд нөлөөт бодис ашиглаагүй, энэ хэрэгт хамааралгүй болох нь тогтоогдож байлаа. Ингэж л хар тамхи хэрэглэсэн урлагийнхан уснаас хуурай үлдэх аргаа олсоор ирсэн байна. Хар тамхины хэрэгт хатуухан шийтгэл оноож байя гэж хуулийнхан бүгд л ярьдаг. Гэтэл эцэстээ “Хааяа өршөөчхөж байя” болсон харагдана. Өнгөрсөн он жилүүдэд тэд ийн хар мөр үлдээж, адгийн болгоныг ардаа үлдээж байсан ч өнөөдөр тайзан дээр гарах нүүртэй байгаад нь гайхмаар. Хууль, хяналтынхан тэнсэн харгалзах ялаа өгч чадаж байгаа бол тайзнаас нь бүрмөсөн хөөчхөж дөнгөмөөр сөн. Чимээгүй аргацаасаар байтал тэд хар тамхины пирамидыг тайзан дээрээ ч үйлдэхэд бэлэн байгаа. Тиймээс тэднийг тайзан дээрээс нь хөөх цаг болжээ.