Бага насны хүүхдүүд дүрс бичлэгт гарсан ёс зүйгүй үг хэллэгийг амьдралынхаа энгийн ярианы хэллэг болгон ашиглаж байна

    Хүүхэд бол цэвэрхэн цагаан цаас.. Харин тэр цагаан цаасан дээр та ч мэдээгүй байхад үзэж, сонсож байгаа дуу, бичлэгүүд нь буруу, муу, ёс зүйгүй бүхнийг тодоос тод "зурж" байгааг анзаарч байна уу. Ялангуяа олон нийтийн анхаарлыг татах, олон дагагчтай болох хүсэлтэй залуусын хийж буй ёс бус үг хэллэг, үйлдэлтэй богино хэмжээний видео бичлэг, зарим дуучны дуунуудын буруу үлгэр дууриалал, үг хэллэг хэрээс хэтрээд цөөнгүй жил боллоо. 

Жишээлбэл, “Ярвагар найз” хэмээх богино бичлэгт “Өө, ямар ярвагар болчихсон хар п... вэ. Дахиж чамтай уулзахгүй” гээд салаавч гаргаад, автомашиных нь хаалгыг саваад гарна. 

Харин “Тэвчээр тасарлаа” бичлэгт залуучуудын ааш  зан ямар болсныг бүрэн илтгэсэн, зандарсан байдалтай ярьж, нэгнийгээ үсдэж, хамар, амыг нь дарж ноцолдоно.

“Согтуу найз охины 10 төрөл”, “Эрүүл шүд” гээд залуучуудын сошиал сүлжээнд байршуулсан бичлэгүүдээс хараалын үггүй секунт олно гэж байхгүй. Бүгд их, бага хэмжээгээр хараалын үгээр ярьж, ойлголцож, харилцана.

Түүнчлэн залуусын дунд ихэд түгээд буй “Нагнайтал ш....  байна, Муу  п...., ш...гүй юу, муу банди, нэг б... чих юмсан, бээб, хамаа, андаа, мань чинь” гэх мэтээр бүдүүлэг, ёс зүйгүй байдлыг сурталчилсан бичлэг залуусын хэлдгээр трэнд болоод удлаа.