Сүүлийн дөрвөн сарын хугацаанд тоглоомын талбайд тоглож байгаад гурван ч хүүхэд хүнд бэртлээ. Хэргийг эргэн сануулбал, өнгөрсөн тавдугаар сарын 3-нд Чингэлтэй дүүргийн XVII хорооны нутаг дэвсгэрт байрлах тоглоомын талбайд тоглож байсан есөн настай охины дээрээс төмөр гулсуур унаж, уушгиа тайруулахад хүрч, хоёр ч хагалгаанд орсон харамсалтай хэрэг болсон билээ.

Тэрбээр тоглоомын талбайд байрлах төмөр гулсуурын хажууд зогсож байхад дээрээс нь нуран унасан байдаг. Энэ хэргийн дараахан буюу тавдугаар сарын 31-нд Баянгол дүүргийн XV хороонд байрлах 23а байрны гадна талбайн гулсуур мөн л 12 настай охины дээрээс унаж, тархинд нь цус хурж, гавлын яс нь цуурсан хэрэг гарсан. Тэгвэл өнгөрсөн амралтын өдөр дахин нэг хүүхэд тоглоомын талбайд тоглож байгаад бэртэж, эрүүл мэндээрээ хохирлоо. Тодруулбал, есдүгээр сарын 26-нд Баянзүрх дүүргийн XIV хороонд байрлах “Цагаан хуаран” хотхоны тоглоомын талбайд тоглож байсан зургаан настай охины дээрээс мөн л бэхэлгээгүй гулсуур унаж, баруун гараа хугалж, зөөлөн эдийн гэмтэл авчээ.

Олон нийтэд мэдэгдсэн нь л дээрх гурван жишээ болохоос тоглоомын талбайд тоглож байгаад хөнгөн хэлбэрээр бэртсэн хэдэн зуун хүүхэд Монголд бий. Хүүхдүүдийн хамгийн аюулгүй тоглож, наадах газар хэмээн итгэж болох тоглоомын талбайд энэ мэтээр байнга шахуу осол, гэмтэл гарч байгаад хэн хариуцлага хүлээх вэ.

Нүглийн нүдийг гурилаар хуурсан гүйцэтгэгч

Тоглоомын талбайд хүүхэд бэртэж, гэмтэх нь дан ганц гүйцэтгэсэн компани, хариуцаж буй СӨХ-ын буруу биш болжээ. Учир нь, тэртэй тэргүй хамгийн хямд гэсэн урд хөршийн хуванцар “хог”-ийг хүүхдүүдийг “тогло” гээд талбай нэртэй алга дарам газар байрлуулчихсан компанид сэтгэл гэж байх уу. Хэрэв тэд сэтгэлтэй байсан бол хямдхан ч гэсэн хуванцраа хүүхэд дараад уначихааргүй болтол нь бэхэлчих байлаа. “Нүглийн нүдийг гурилаар хуурна” гэгчээр хүлээлгэж өгсөн л бол энэ асуудал хамаагүй мэт. Гүйцэтгэсэн компанитай холбоотой хэрэг гарахаар тэд “Ямар албан тушаалтан, хэн гэж таньдаг хүн энэ асуудлыг намжааж чадах вэ, эндээс яаж хохиролгүй, нэр цэвэр гарах вэ” гэх бодолдоо хөтлөгдсөөр тэд хаа сайгүй гүйж байна. “Хүүхэд амь эрсэдчихээгүй л бол үүнийг аргалчихна” гэсээр тэд нялх үрсээр минь туг тахисаар дууслаа.

Хариуцлагагүй хариуцагч

Харин тоглоомын талбайн эд хогшил, аюулгүй байдлыг бүрэн хангаж ажиллах ёстой СӨХ, хороо, дүүргийн албан хаагчдад аюулгүй ажиллагааны дүрэм, хариуцлага, хяналт гэж алга. Тоглоом нь байж л байвал “байна” гэж хардаг тэдэнд “Бэхэлгээтэй байна уу, эвдэрчихсэн эсэх, хүүхэд бэртэхгүй байгаа” гэж бодох бодол хумсын толион чинээ ч алга. Хүүхэд бэртчихсэн байхад “Тоглоом эвдчихлээ” гэж бухимдаж байгаа тэднээс “Бухын доодохыг харж, үнэг турж үхнэ” гэгчээр аюулгүй ажиллагаа, хариуцлага нэхээд амны гарз. Хэрэв тэд хүүхдийн төлөө жаахан ч гэсэн сэтгэлтэй байсан бол ядаж тоглоомын талбайны эрэг, шургийг бүртгээд харчих байсан биз. Хариуцлагагүй хариуцагч байхаа зогсооё. СӨХ, хороо, дүүргийнхээ нутаг дэвсгэрт байгаа тоглоомын талбайг өдөрт ядаж нэг удаа эргэж, шалгадаг баймаар байна.  

Хүүхдийнхээ тоглох газрын аюулгүй байдлыг эцэг, эхчүүд шалгадаг байя

Нэгэнт л гүйцэтгэгч компани, хариуцсан байгууллага нь хариуцлага хүлээхгүй, таны хүүхдийн төлөө хуруугаа ч хөдөлгөхгүй юм чинь эцэг, эхчүүд өөрсдөө хүүхдийнхээ тоглох газрыг аюултай эсэхийг шалгаж байя. “Ниргэсэн хойно нь хашхирав” гэгчээр хүүхдээ бэртсэн хойно, аль нэг эрхтнээ тайруулсны дараа, цаашлаад бүүр амиа алдсаны араас голынхоо дуугаар хашхирмааргүй байна. Урьдчилан сэргийлж суръя. Хүүхдийн чинь гулгах гулсуур бэхэлгээтэй байна уу, тоглоомын талбайд ил гарсан цахилгааны утас, тээглээд унах төмөр байна уу гэдгийг тойруулаад нэг хардаг байцгаая. Тэртэй тэргүй та хүүхэдтэйгээ цуг тоглоомын талбай дээр очиж байгаа шүү дээ. Энэ л таны хүүхдийнхээ төлөө хийж чадах ганцхан алхам ч байж мэднэ. Бэртчихсэн хойно нь мянга хариуцлага нэхээд ч таны хүүхдийн эрүүл мэндийг нөхөж, буцааж чадахгүйгээс хойш эцэг, эхчүүд нь болзошгүй аюулаас сэргийлж, хүүхдийнхээ тоглодог талбайг хүүхдэд ээлтэй болгоход анхааръя.