Улаанбаатар хотын төвөөс 19 км зайд орших Баянголын ам гэх газар "Хос дүнз" ХХК-иас 40 айлын "Хос жаргал" хотхон барьж эхэлсэн. Дуучин Ц.Амарбаяр, жүжигчин Г.Золбоот зэрэг олны танил, нэр, нөлөө бүхий хүмүүсээр маркетингаа хийлгэж байсан "Хос дүнз" ХХК-ийн шинэ хотхоны захиалга дүүрч, шинээр баригдаж байгаа 40 хаусаа богино хугацаанд зарсан аж. Тэгвэл "Хос жаргал" хотхоныг барьсан газрын эзэнд газар шилжүүлэн авах гэрээгээ зөрчиж, мөнгөө өгөөгүй, эзнийг нь сүрдүүлэн дарамталсан хэрэг цагдаагийн байгууллагад шалгагдаж байгаа юм. Харин үүний дүнд газрын асуудалтай "Хос жаргал" хотхонд захиалга өгсөн 40 орчим айл эд хөрөнгөөрөө хохирч, "гудамжинд" гарах эрсдэл үүсээд байна.

-"ХОС ЖАРГАЛ" ХОТХОНД ЗАХИАЛГА ӨГСӨН ИРГЭД ГАЗРЫН ГЭРЧИЛГЭЭГ НЬ ХАРАХАД "ХАМТРАН АЖИЛЛАДАГ" ГЭЖ ХУДАЛ ХЭЛДЭГ ГЭВ-

"Хос жаргал" хотхоныг барьж байгаа газар нь нийслэлийн Сонгинохайрхан дүүргийн нэгдүгээр хороонд байрлах Баянголын ам гэх газар. Тэгвэл өнгөрсөн гуравдугаар сард иргэн Д.Н-аас О.Хосболор гэгч хоёр одоогийн "Хос жаргал" хотхоныг барьсан хоёр га газрыг нийт 450 сая төгрөгөөр үнэлж, урьдчилгаа 50 сая төгрөг шилжүүлсэн ч, үлдэгдэл 400 сая төгрөгийг өнөөг хүртэл өгөөгүй аж. 

                        Хотхонд захиалга өгсөн зарим хүн гүйцэтгэгч компаниас газрын гэрчилгээг нь харахыг шаардахад тус компани болон компанийн алба хаагчийн бус, иргэн Д.Н-ын нэр дээр байгаа газрын гэрчилгээний хуулбар үзүүлж, "Хамтран ажилладаг" гэж  хэлдэг гэнэ. 

-О.ХОСБОЛОР ГЭГЧ НЬ ГАЗАР ЭЗЭМШИГЧ Д.Н-г ДАРАМТАЛЖ, МӨНГИЙГ НЬ ӨГӨХГҮЙ ГЭЖ СҮРДҮҮЛЖЭЭ-

Иргэн Д.Н, О.Хосболор хоёрын байгуулсан газар эзэмших эрх шилжүүлэх гэрээнд зааснаар өнгөрсөн гуравдугаар сарын 14-нд урьдчилгаа 50 сая төгрөгийг шилжүүлжээ. Харин урьдчилгаа хийсэн өдрөөс гурван сарын дараа буюу зургадугаар сарын 14-нд үлдэгдэл 400 сая төгрөгийг шилжүүлэх ёстой байсан аж. Гэрээнд  үлдэгдэл төлбөрийг шилжүүлэх хугацаа хэтэрснээс хойш нийт үнийн дүнгийн 0.5 хувиар алданги төлөхөөр тусгажээ.

Улмаар газар эзэмшигч Д.Н "Хос жаргал" хотхоныг барьж байх явцад Баянголын аманд очиход анх газар шилжүүлэн авах гэрээ байгуулсан "Хос дүнз" ХХК болон "Хосболор" ХХК-ийн захирал гэгч О.Хосболор уулзсан байна. Тэгэхдээ иргэн Д.Н-г сүрдүүлж, "Таньдаг хүнээрээ яриулж байгаад газрын гэрчилгээг чинь шилжүүлээд авчихна", "Чаддаг юм бол хууль, цагдаадаа хандаарай" гэх зэргээр дарамталсан гэх.

Үүнтэй холбоотойгоор иргэн Д.Н О.Хосболор гэгчээс өөрийг нь хамгаалж өгөхийг хүссэн өргөдөл бичиж цагдаагийн байгууллагад хүргүүлсэн байна. Хэрэг Хан-Уул дүүргийн цагдаагийн хэлтэст шалгагдаж байгаа аж.