ЭРГЭЛТ.МН мэдээллийн сайт Монгол Улсын Хүний эрхийн үндэсний комиссын 19 дэх итгэлийг тоймлон хүргэж байгаа билээ. Энэ удаад "Химийн хорт болон аюултай бодисын хадгалалт, хамгаалалтын талаар тулгамдаж буй зарим асуудал" сэдвийн хүрээнд төрийн байгууллага болон иргэний өгсөн баримтыг нийтэлж байна.

Баримт-1

...Сүхбаатар  аймагт  2004  оны  хоёрдугаар  сард   малын  гоц халдварт шүлхий өвчин гарчээ. Уг өвчинтэй тэмцэх, урьдчилан сэргийлэх арга  хэмжээний  ариутгал  халдваргүйжүүлэлтэд  ашиглаж  байсан  "формалин"  гэх  химийн  бодис  дууссанаас  улсын  нөөцөөс  2004  оны  хоёрдугаар  сарын  27-ны  өдөр  аймгийн  мал  эмнэлгийн  албанд  зургаан  тонн  “формалин”  өгч,  өвчин  гарсан  сумдад хуваарилсан байна. Гэтэл   тухайн   бодис   нь   “формалин”   биш,   маш   хортой   “формальдегид”   гэдэг   химийн   бодис   болох   нь   тогтоогдсон  тул  ашиглаагүй  үлдэгдэл  бодисыг  сумдаас  буцаан татаж, мал эмнэлгийн хашаанд одоог хүртэл буюу 16 жил хадгалж байна. Энэхүү   бодисоор   тухайн   үед   халдваргүйжүүлэлт   хийсэн   ажилтнууд хордлого авч, 20 гаруй хүн эрүүл мэндийн үзлэгээр элэг  болон  бусад  эд  эрхтний  өөрчлөлттэй  гарч  аймгийн  нэгдсэн  эмнэлэгт  хор  саармагжуулах  эмчилгээ  хийлгэж байжээ.

(ХЭҮК-оос 2019 онд Сүхбаатар аймагт ажилласан ажлын хэсгийн тэмдэглэлээс)

Баримт-2

Монгол  Улсын  хоёр  иргэн  2019  оны  тавдугаар  сарын  3-ны  өдөр  Баянзүрх  дүүргийн  XI  хорооны  нутаг  дэвсгэрт  байрлах  “Скай  ресорт”  цанын  баазын  хашаанд  .... дугаартай  автомашинд Засгийн газрын 2007 оны 95 дугаар тогтоолоор баталсан  “Монгол  Улсад  ашиглахыг хязгаарласан  химийн  хорт аюултай бодисын жагсаалт”-д багтсан мөнгөн усыг хууль бусаар хадгалсан,  худалдсан, худалдан  авсан, тээвэрлэсэн, бусдад дамжуулсан, зориулалтын бусаар ашигласан үйлдлийг цагдаагийн байгууллага илрүүлэн шалгаж шүүхээр шийдвэрлүүлэх саналтай прокурорт шилжүүлсэн байна.

(ЦЕГ-ын 2020 оны хоёрдугаар сарын 20-ны өдрийн 01/122 албан бичгээр ирүүлсэн мэдээллээс)

Баримт-3

Иргэн  Б  нь  2018  оны  арванхоёрдугаар  сарын  21-ний  өдөр  .... ДГО  улсын  дугаартай  УАЗ  маркийн  автомашинаар  450  килограмм химийн хорт бодисыг улсын хилээр  хууль бусаар нэвтрүүлсэн   үйлдлийг   цагдаагийн   байгууллага   шалгаж   шүүхээр шийдвэрлүүлэх саналтай прокурорт шилжүүлжээ.

(ЦЕГ-ын 2020 оны хоёрдугаар сарын 12-ны өдрийн 01/122 албан бичгээр ирүүлсэн мэдээллээс)

Баримт-4

Өмнөговь  аймгийн  Номгон  сумын  нутаг  дэвсгэрт  ашигт  малтмал ашиглах үйл ажиллагаа явуулах тусгай зөвшөөрөлтэй “Д” ХХК-ийн уурхайн дарга БНХАУ-ын иргэн Ф нь 2017 оны есдүгээр сараас аравдугаар сарын  29-ний  өдрийг  хүртэлх  хугацаанд  хууль  бусаар  олж  авч  тээвэрлэсэн  химийн  хорт  болон  аюултай  бодис  болох  82  тонн  натри  сульфидийг  хууль  бусаар  хадгалж байжээ. Тэрбээр хадгалж байсан бодисоо  ашиглан  хүдрийн  баяжмал  бэлтгэх  явцдаа  баяжуулах  технологийн  горимыг  зөрчсөнөөс   говь   цөлийн   хуурай   ландшафтад   гадаргын  ил  урсац  үүсгэсэн,  далд  уурхайн  шүүрлийн  усыг  байгальд шууд асган 5120 ам метр хөрс, талбайг химийн бодисоор бохирдуулсан байна. Мөн 2.27  га  талбайд  эвдрэл  үүсгэж,  41150  шоо метр ухаш  бүхий  эвдрэлийг  газрын  хэвлийд  үүсгэсэн  зэргээр  Өмнөговь аймгийн Байгаль орчин, аялал жуулчлалын газарт нийт  134.168.951  төгрөгийн  буюу  их  хэмжээний  хохирол  учруулсан нь тогтоогджээ.

(Хан-Уул дүүргийн Эрүүгийн хэргийн анхан шатны шүүх)

Баримт-5

Нийслэлийн  Налайх  дүүрэгт  үйл  ажиллагаа  явуулж  байсан  шилний үйлдвэрт ашиглаж байсан химийн хорт болон аюултай бодисын хадгалалт, хамгаалалт алдагдсанаас тухайн газрын хөрс  болон  агаарт  шингэжээ. Улмаар  иргэдийн  эрүүл  мэнд,  байгаль орчин, мал, амьтанд сөрөг нөлөө үзүүлж байна. Энэ нь  иргэдийн  олон  улсын  гэрээ,  конвенц  болон  дотоодын  хууль  тогтоомжоор  баталгаажуулсан  эрүүл,  аюулгүй  орчинд  амьдрах эрх ноцтой зөрчигдөхөд хүргэж байгааг анхааралдаа авна уу.

(ХЭҮК-т ирүүлсэн иргэний гомдол)