Эргэлт.мн мэдээллийн сайт Нийслэлийн прокурорын газраас “Оффшор бүсэд хөрөнгөө байршуулсан 23 иргэний хэрэг бүртгэлтэй байгаа. Олон улсын байгууллагатай хамтран хэрэг хянан шийдвэрлэх ажиллагаа үргэлжилж байна” гэх мэдээлэлтэй зэрэгцэн оффшор бүсээс эхний ээлжинд хэн хэний хөрөнгө орж ирэх магадлалтайг олон нийтэд хамгийн анх удаа зарлаж, танилцууллаа. Энэ долоо хоногийн Эргэлтийн онцлох нийтлэлээр "Оффшор бүсээс хөрөнгөө хураалгаж мэдэх 23 албан тушаалтан"-ыг нэрлэж байна. 

Бид эхний ээлжинд Ерөнхий сайд асан С.Баяр, Сангийн сайд асан С.Баярцогт, Я.Очирсүх, УИХ-ын гишүүн Сү.Батболд, Б.Дэлгэрсайхан, Д.Цогтбаяр, Л.Энх-Амгалан,  Д.Батбаяр, УИХ-ын гишүүн асан Б.Батбаярын хүү Б.Батхишиг, “Петровис” компанийн ерөнхий захирал агсан Ж.Оюунгэрэл нарын 10 хүний нэрийг ил болгов.

Тухайлбал, УИХ-ын гишүүн Сү.Батболдын оффшор хөрөнгө хэрхэн ил болж байсан талаар уншигч танд онцлон хүргэе. “Багамын баримтуудад илэрсэн оффшор хаягуудын нэг нь Монголын алтны компанийнх” гэх мэдээлэл гаднын хэвлэлд гарснаар түүнийг нэр ил болж байлаа. Мөн түүний ах С.Бат-Очир 2004 онд оффшор бүс дэх компанид 21 сая төгрөгөөр хувьцаа худалдаж авсан ч үйл ажиллагаа нь тодорхойгүй байсан тул жилийн дараа гарсан гэх мэдээлэл хүртэл бий. Ерөнхийлөгчийн сонгуульд МАН-аас нэр дэвших магадлалтай байгаа УИХ-ын гишүүн Сү.Батболд сонгуулиас өмнө оффшор хөрөнгөө хураалгаж болзошгүй хүний тоонд зүй ёсоор багтаж байна.

Дараагийн онцлох хүн бол УИХ-ын гишүүн Б.Дэлгэрсайхан. Түүний оффшорын "Eiffel View Universal Holdings" гэх бүртгэлтэй данс ил болсон гэдэг. Тэрбээр 1987-1989 онд Дорноговь аймгийн Цагдаагийн хэлтэст мөрдөн байцаагч, 1989-1992 онд ахлах мөрдөн байцаагч, мөрдөн байцаах газрын тасгийн даргаар ажиллаж байжээ. Түүний үүсгэн байгуулсан "Болдтөмөр Ерөө гол” компани төмрийн хүдрийг түүхийгээр нь Хятад руу гаргадаг байна. Мөн Сэлэнгэ аймгийн Ерөө суман дахь төмрийн хүдрийн ордоос түүний удирддаг компани өөрсдийн барьсан 90 км төмөр замаар хүдэр тээвэрлэн БНХАУ руу гаргахдаа вагоны даацын хэмжээг багасган гаальд мэдүүлж, онц их хэмжээний татвараас зайлсхийсэн байж болзошгүй гэх хэрэг гарч байв. Энэ хэрэгтэй холбоотойгоор Б.Дэлгэрсайхан цагдан хорих 461 дүгээр ангид саатуулагдаж ч байжээ. Энэ мэт хууль бус наймаа, хулгайн тээвэр, залилангийн хэргээр тэр шалгагдаж, байцаагдаж байсан ч хууль хяналтынханыг өлхөн аргалаад гараад ирдэг гэнэ. УИХ-ын хойморт суугаа тэрбээр хэд хэдэн гишүүнийг манлайлан “нуусан” хөрөнгөө хураалгаж мэдэхээр байна.

Уншигч та оффшор бүсэд бүртгэлтэй баттай эх сурвалжийн бататгасан 10 хүний мэдээллийн дэлгэрэнгүйг энд дарж уншина уу. Бид маргаашийн дугаартаа Оффшор бүсэд хөрөнгөө байршуулсан 23 иргэнийг үргэлжлүүлэн мэдээллэх болно.