“Эрдэнэт үйлдвэр”-ийн удирдлагууд төрийн өмчийг хэд хэдэн хямд үнээр борлуулж, их хэмжээний хохирол учруулж байгаа талаар бид цувралаар хүргэж байгаа билээ. Тодруулбал, 1.1 тэрбум төгрөгийн үнэлгээтэй 19 ширхэг машиныг 55 сая төгрөгөөр дуудлага худалдаагаар борлуулжээ. Тухайлбал,  “Пургон”ныг  500 мянга, “Лексус 570”-ыг 15 сая, “Mercedes-Benz”-ийг 3.5 сая, “Toyota Hiace” машиныг дөрвөн сая төгрөгөөр акталж, хувьчилсан байгаа юм.

Тэгвэл бид энэ удаад 2021 онд "Эрдэнэт үйлдвэр" ТӨҮГ-ын үндсэн хөрөнгөнд бүртгэлтэй эд зүйлсийг акталж, хувьчлахдаа маш хямд үнээр худалдсан баримтыг хүргэж байна.

493 сая төгрөгийн үнэлгээтэй зөөврийн бутлуур 17 сая төгрөгийн үнэд хүрчээ

  2006 оны тавдугаар сарын 31-нд үйлдвэрлэгдсэн зөөврийн бутлуурын балансын үнэ нь 493 сая төгрөг ажээ. Харин "Эрдэнэт үйлдвэр" ТӨҮГ-ынхан уг техникийг 10 гаруй жил хэрэглэж, 17 сая төгрөгөөр дуудлага худалдаагаар борлуулсан байна. Өөрөөр хэлбэл, үйлдвэрийнхэн ойролцоогоор 475 сая төгрөгийн элэгдэл үүссэн гэж тогтоож, авсан үнэнээсээ арав дахин хямд үнээр акталжээ.

ЭКСКАВАТОРЫГ 3.5 ТЭРБУМ ТӨРГӨРӨӨР АВЧ, 180 САЯ ТӨГРӨГӨӨР АКТАЛЖЭЭ

Харин экскаватор (карьерийн гинжит)-ийг 180 сая төгрөгөөр үнэлж, акталжээ. Уг техникийг 2006 онд үйлдвэрлэж, “Эрдэнэт үйлдвэр” цоо шинээр нь 3.5 тэрбум төгрөгөөр худалдаж авч байсан байна. Харин 10 гаруй жилийн дараа 180 сая төгрөгөөр дуудлага худалдаагаар борлуулжээ.

Хадуур, төмс хураагч, суулгагчийг 50 мянган төгрөгөөр хувьчилжээ

Мөн хэд хэдэн техникийг дуудлага худалдаагаар 50 мянган төгрөгөөр заржээ.

Тодруулбал, КН загварын хадуурыг 1.2 сая төгрөгөөр авсан ч 50 мянган төгрөгөөр заржээ. Тус техникийг 2008 онд үйлдвэрлэсэн, “Эрдэнэт” үйлдвэрт цоо шинээр нь тус онд авч байсан.

-2008 онд үйлдвэрлэгдсэн төмс хураагч 1.2 сая төгрөгөөр худалдан авсан ч 50 мянган төгрөгөөр зарсан.

-2008 онд үйлдвэрлэсэн төмс суулгагчийг 1.1 сая төгрөгөөр авч, 50 мянган төгрөгөөр акталж, хувьчилжээ.

РЕДУКТОР 678 САЯ ТӨГРӨГӨӨС 80 САЯ БОЛЖ БУУРЧЭЭ

Редукторыг 80 сая төгрөгөөр хувьчилжээ. Тодруулбал,  2008 онд үйлдвэрлэсэн хоёр ширхэг редукторыг дуудлага худалдаагаар тус бүр 80 сая төгрөгөөр акталж, борлуулжээ. Балансын үнэ нь 678 сая төгрөг ч элэгдэл нь 670 орчим сая төгрөг гэж үзсэн байна.

Мөн суурь машиныг 23 сая төгрөгөөр авсан ч нэг сая төгрөгөөр хувьчилжээ.

КАРДАН ДАМЖУУЛГЫГ 110 САЯ ТӨГРӨГӨӨР ХУВЬЧИЛЖЭЭ

Харин кардан дамжуулгыг ердөө гурван жилийн өмнө буюу 2018 онд 234 сая төгрөгөөр авч байжээ. 2021 онд элэгдэл ихтэй гэж үзсэн учраас 110 сая төгрөгөөр борлуулсан байна. Өөрөөр хэлбэл, гурван жилийн дотор 200 гаруй сая төгрөгийн үнэлгээтэй багажийн үнэ гурав дахин буурчээ.

Үүгээр зогсохгүй 2015 онд 96 сая төгрөгөөр авсан цахилгаан хөдөлгүүрийг 30 сая төгрөгөөр акталж, дуудлага худалдаагаар энэ үнээр заржээ.

Харин 2016 онд 93 сая төгрөгөөр авсан цахилгаан соронзон өлгүүрийг 40 сая төгрөгөөр хувьчилсан байна.

Веб серверт зориулсан галт ханын төхөөрөмжийг 101 сая төгрөгөөр авч, нэг сая төгрөгөөр заржээ. Өрөөр хэлбэл, 100 сая төгрөгөөр хямдруулсан байна.

Сүлжээний зам заагчийг 17 сая төгрөгөөр авсан ч мөн л нэг сая төгрөгөөр хувьчилжээ.