ТАГНУУЛЫН ЕРӨНХИЙ ГАЗРЫН ДАРГА АСАН Б.ХУРЦ БЭЭЖИН ХОТООС ОХУ РУУ ДАЙНЫГ ДЭМЖИЖ, ЗЭВСЭГ, ХУВЦАС ИЛГЭЭХИЙГ ЗАВДАВ УУ

      Тагнуулын Ерөнхий газрын дарга асан Б.Хурц хамаарал бүхий “Изинис Эйрвейз” ХХК-ийн ачааны онгоцоор БНХАУ-ын Бээжин хотоос ОХУ руу 31241 килограмм цэргийн ачаа, хувцас хэрэглэл тээвэрлэхийг завдсан талаар эх сурвалж бидэнд мэдээлсэн юм. Тордуулбал, “Изинис Эйрвейз” ХХК-ийн JU-1332 бүртгэлийн дугаартай Airbus A330-200 загварын онгоцны ачаанд шалгалт хийхэд  байлдааны тусгай зориулалтын хувцас, дрон, духанд зүүдэг камер болон чип илэрсэн гэдгийг албаны эх сурвалж бидэнд мэдээлсэн билээ. Тиймээс “Изинис Эйрвейз” ХХК-ийн онгоц одоог хүртэл ОХУ руу нислэг үйлдээгүй “Чингис хаан” олон улсын нисэх буудалд байгаа гэх.

     Учир нь, Тагнуулын Ерөнхий газрын дарга асан Б.Хурц өөрийн хамаарал бүхий “Изинис Эйрвейз” ХХК-ийн онгоцоороо Бээжин хотоос ОХУ руу цэргийн ачаа тээвэрлэхийг завдсан бол Монгол Улс дайныг дэмжигч улс гэгдэж, Нэгдсэн үндэсний байгууллага болон олон улсын гэрээ, конвенциор хүлээсэн үүргээ ноцтой зөрчсөн гэж үзэх аж. Мөн Монголоор дамжуулан байлдааны цэргийн хувцас, багаж, хэрэглэлийг ОХУ руу зөөвөрлөдөг байсныг нуун дарагдуулсан байж болзошгүй ИНЕГ-ын болон бусад холбогдох албан тушаалтнуудыг шалгаж эхэлсэн гэх.

ИНЕГ-ЫН ДАРГА С.МӨНХНАСАН ИХ ХЭМЖЭЭНИЙ ХАХУУЛЬ АВЧ, ОХУ БОЛОН УЗБЕКСТАНЫ ХӨРӨНГӨ ОРУУЛАЛТТАЙ “ZORT AIRLINE” ХХК, “ХҮННҮ ЭЙР” ХХК-ИЙН ХУУЧИН ОНГОЦЫГ МОНГОЛД БҮРТГЭЖЭЭ

     Иргэний нисэхийн Ерөнхий газрын дарга С.Мөнхнасан их хэмжээний хахууль авч, 1970 оны ИЛ-76 агаарын хөлөг болон 1987 онд үйлдвэрлэсэн хуучны “МИ-8” нисдэг тэргийг Монгол Улсад бүртгэж, Африк Улсад үйл ажиллагаа явуулах бэлтгэлийг хангасан гэх. Манай улсад ОХУ болон Узбекстаны 100 хувийн хөрөнгө оруулалттай “Zort Air” ХХК хууль бусаар үйл ажиллагаа явуулдаг гэдгийг албаныхан онцолсон. Тус компанийн 51 хувийг Монгол Улсын иргэн эзэмшиж байгаа тохиолдолд Монгол Улсын иргэний агаарын тээврийн компаниар гэрчилгээжүүлдэг хуультай. Энэ үйлдлийг Иргэний нисэхийн Ерөнхий газрын дарга С.Мөнхнасан их хэмжээний хахууль авч гүйцэтгэсэн талаар Иргэний нисэхийн Ерөнхий газрын ажилтнууд  ярьдаг. Тодруулбал, хууль бусаар Монгол Улсад бүртгэсэн нисдэг тэргүүдийг гэрчилгээжүүлэхэд 80 сая төгрөг зарцуулсан гэХ.Дээрх үйлдэл нь Монгол Улсын Иргэний нисэхийн салбарт ямар хор хөнөөлтэй болохыг дурдъя. Тодруулбал,

-Он удаан жил болсон агаарын хөлөг нь осолдох магадлалтай. Иргэний нисэхийн Ерөнхий газраас  дээрх агаарын хөлгүүдэд хяналт тавих мэргэжлийн боловсон хүчин байхгүй.

-ОХУ, Узбекстаны хамтарсан компанийн агаарын хөлгийг Монгол Улсад бүртгүүлж, Африк руу нисгэж байгаа нь хориотой ачаа бараа тээвэрлэх магадлалтай. Ийм тохиолдолд Монгол Улсын дотоодын хууль, тогтоомж, Олон улсын гэрээ конвенцийг ноцтой зөрчиж болзошгүй. Цаашилбал, Монгол Улсыг НҮБ болон Олон улсын иргэний нисэхийн байгууллагын хоригт оруулах ноцтой шалтгаан болно гэж үзэж болно гэх.

ИРГЭНИЙ НИСЭХИЙН ЕРӨНХИЙ ГАЗРЫН ДАРГА С.МӨНХНАСАНГИЙН ҮНДЭСНИЙ АЮУЛГҮЙ БАЙДАЛД НӨЛӨӨЛЖ БОЛЗОШГҮЙ ХЭРГИЙГ ХУУЛИЙНХАН ШАЛГАЖ ЭХЭЛЖЭЭ

    Иргэний нисэхийн Ерөнхий газрын дарга С.Мөнхнасан нь “Хүннү Эйр” ХХК-тай хамтран ОХУ-д бүртгэлтэй АTR-72 маягийн агаарын хөлгийг Монгол Улсын иргэний нисэхийн бүртгэл рүү шилжүүлэн ОХУ руу гаргасан талаар эх сурвалж бидэнд мэдээлсэн юм. “АTR-42” агаарын хөлгийг мөн адил хууль бусаар Монгол Улсад бүртгэж ашигласан гэх мэдээлэл бий. Эдгээр агаарын хөлгүүд нь Монгол Улсад бүртгэлтэй хэдий ч ОХУ-ын “Kras Air”-ын агаарын хөлгүүд юм. Иргэний нисэхийн Ерөнхий газрын дарга С.Мөнхнасан нь энэ төрлийн үйл ажиллагаандаа гаршиж байгаа нь Монгол Улсын иргэний нисэхийн салбарын хөгжилд маш том гарз учруулах, олон улсын хоригт орж болзошгүй үйлдэл гэж болно. Иймд, Иргэний нисэхийн Ерөнхий газрын дарга С.Мөнхнасанг хуулийн байгууллагынхан яаралтай шалгаж, Үндэсний аюулгүй байдалд нөлөөлж болзошгүй онц ноцтой үйл ажиллагааг нь таслан сэргийлэх шаардлагатай. Хэрвээ түүний эхлүүлсэн ноцтой үйлдлийг таслан сэргийлэхгүй бол Монгол Улс Нэгдсэн үндэсний байгууллагын хоригт орох, Олон улсын иргэний нисэхийн байгууллагаас Монгол Улсад бүртгэлтэй агаарын хөлгүүдийн нислэгийг зогсоох, “Чингис хаан” олон улсын нисэх буудлын үйл ажиллагаа зогсох эрсдэлтэй болжээ.