Нэг тэрбум төгрөгөөр байшингийн суурь цутгаж, улсын төсвийн хөрөнгийг газарт булсан, Сангийн яамны ажилтнуудыг хууран мэхэлж, залилсан гэх “хэрэг”-тэй “Би Эм Жи Юу” ХХК-ийн захирал Б.Визаяаг хууль хяналтын байгууллагаас шалгаж эхэлжээ. Тодруулбал, 2022 онд “Би Эм Жи Юу” ХХК нь Ховд аймгийн Алтай суманд орчин үеийн стандарт нийцсэн спорт заал барих тендерт ялсан байдаг. Улсын төсвийн хөрөнгөөс 2.3 тэрбум төгрөг төсөвлөж, алслагдсан сумын хүүхэд, багачуудыг шинэ спорт заалтай болох өрнүүн их ажил эхлээд жил тойрох нь. Харамсалтай нь, тус компанийнхан нийт санхүүжилтийнхээ 50 хувийг буюу 1.024.800.752 төгрөгийг авсан ч ажлаа хийгээгүй гэнэ. Өөрөөр хэлбэл, тус компанийн ажилтнууд улсын төсвийн тэрбум төгрөгөөр зөвхөн нүх ухаж, байшингийн суурь цутгажээ. 

    Энэ талаар эх сурвалж хэлэхдээ “Спорт заалны бүтээн байгуулалт эхлэх гэж хугацаа алдсан. Ажил эхэлсэн ч ухсан нүх, цементэн сууринаас өөр хийсэн ажил алга. Тэгсэн хэрнээ хийх ажлынхаа тал мөнгийг авчихсан. Ажил өнөөдөр зогсонги, аргацаасан байдалтай байна. Компанийнх нь захирлыг хууль хяналтын байгууллагаас шалгасан тул ажилтнууд нь тараад явчихсан гэсэн. Энэ янзаар Алтай сумынхан спорт заалтай болно гэдэг үлгэрийн далай болох шинжтэй. Хөрөнгөнөөс болоод энэ ажил царцаж, төсвийн мөнгийг шороонд булаад хаях бололтой” гэв. Ноцтой нь, “Би Эм Жи Юу” ХХК-ийн захирал Б.Визаяа болон холбогдох хүмүүс хуурамч бичиг тайлан гаргаж, эрх бүхий албан тушаалтнуудтай тохиролцож, Сангийн яамнаас санхүүжилтийн 50 хувийг шилжүүлэн авчээ. Ийм үндэслэлээр “Би Эм Жи Юу” ХХК-ийн захирал Б.Визаяаг АТГ-аас шалгаж эхэлсэн талаар эх сурвалж мэдээллээ. 

     Эх сурвалжийн мэдээлснээр “Би Эм Жи Юу” ХХК-ийн барилга угсралтын ажил 20 хувийн гүйцэтгэлтэй байгаа. Барилгын сууриас өөр ажил хийгээгүй. Гэвч барилга угсралтын ажил гүйцэтгэгч “Би Эм Жи Юу” ХХК-ийн захирал Б.Визаяа барилгын гадна дулаан, цэвэр усны хангамжийн системийг угсарсан, сорилтоор шалгарсан акт, төмөр бүтцийг угсарч гагнасан акт, ханийн өргийн акт зэрэг бичиг баримт бүрдүүлж, 90 орчим хувийн гүйцэтгэлтэй” хэмээн хуурамч тайлан гаргаж, 1.024.800.752 төгрөгийн санхүүжилт авсан” гэлээ. Уг хуурамч тайлангаа тус компанийнхан өнгөрсөн долдугаар сард гаргаж, өгсөн гэнэ. 

-“БИ ЭМ ЖИ ЮУ” ХХК-ИЙН ЗАХИРАЛ Б.ВИЗАЯА БИЕИЙН ТАМИР СПОРТЫН УЛСЫН ХОРООНЫ ДАРГА Д.ЖАРГАЛСАЙХАНТАЙ ХУЙВАЛДАЖ, 2.3 ТЭРБУМ ТӨГРӨГ ЗАЛИЛСАН УУ-

     Хуурамч бичиг баримт бүрдүүлж, их хэмжээний санхүүжилт авсан байж болзошгүй “Би Эм Жи Юу” ХХК Б.Визаяа барилгын ажил гүйцэтгэгч компанийн гадна дулаан, цэвэр усан хангамжийн системийг угсраагүй, ханаа босгоогүй, төмөр, тоосго зэрэг материалаа татаж аваагүй байж бүхнийг хийсэн мэт бичиг баримт бүрдүүлж, Биеийн тамир, спортын улсын хорооны дарга Д.Жаргалсайханаар дамжуулж, Сангийн яамнаас тэрбум гаруй төгрөгийн санхүүжилт авсан гэнэ. Тодруулбал, Биеийн тамир, спортын улсын хорооны дарга Д.Жаргалсайханы 2022 оны долдугаар сарын 5-ны 1/581 дугаартай Сангийн яамны хөрөнгө оруулалт, хөгжлийн санхүүжилтийн газар хүргүүлсэн албан бичгийн дагуу Сангийн яамнаас төсөв шилжүүлэн авсан гэнэ. Иймд дээрх ажлын гүйцэтгэлийн бичиг баримтыг албажуулан гарын үсэг зурсан, санхүүжилт олгосон эрх бүхий албан тушаалтнууд хуйвалдаж, “Би Эм Жи Юү” ХХК-д санхүүжилт олгох нөхцөлийг бүрдүүлсэн байж болзошгүй учир АТГ-аас “Би Эм Жи Юу” ХХК-ийн захирал Б.Визаяаг шалгаж байгаа аж. 

Бид уг мэдээллийг тэнцвэртэй хүргэх үүднээс Б.Визаяатай холбогдож, энэ талаар тодрууллаа. 

-Таныг Ховд аймгийн Алтай сумын заалыг бариагүй мөртлөө хуурамч тайлан гаргаж, эрх бүхий албан тушаалтнуудтай хуйвалдаж, Сангийн яамнаас тэрбум гаруй төгрөг авсан гэх мэдээлэл гараад байна. Энэ талаар тайлбар өгөхгүй юу?

     -Алтай сумын спорт заалны ажил 70 орчим хувьтай үргэлжилж байгаа. Одоо ханийг нь өрж байна шүү дээ. 2023 оны арваннэгдүгээр сард хүлээлгэж өгөхөөр гэрээгээ сунгасан. Би Сангийн яамнаас мөнгө аваагүй. Өнгөрсөн жил заалны суурийг цутгаж дуусгасан. Тухайн үед Сангийн яамнаас Биеийн тамир, спортын улсын хорооны данс руу 300 сая төгрөг орсон байсан. Энэ мөнгийг л авсан. Түүнээс хойш Биеийн тамир, спортын улсын хорооноос мөнгө аваагүй байна. Шалгах ёстой газраар нь шалгуулаад үзнэ биз. 

-Таныг хууль хяналтын байгууллагаас шалгаж байгаа гэсэн?

    -Алтай суманд спорт заал барих тендерт ялагдсан компанийн удирдлага Г гэх хүн манай компанийн талаар худал мэдээлэл тарааж, хуулийн байгууллагад мэдэгдсэн юм билээ. Би хуулийн дагуу ажлаа хийж байгаа. Тиймээс АТГ-т шалгуулахаас айхгүй байна. Одоогийн байдлаар тоосго, төмөр зэрэг өрөлтийн материал ирчихсэн бэлэн байгаа. 

-Улсын төсвөөс санхүүжилт гэж нийт хэдэн төгрөг аваад байгаа юм бэ? 

    -Суурь цутгах 300 сая төгрөг манай компанийн дансанд орж ирсэн. Бид өөр мөнгө аваагүй. 

-Спорт заалны барилгын 70 хувийг 300 сая төгрөгөөр барьсан гэсэн үг үү?  

     -Бидэнд орж ирсэн мөнгө нь л тэр.