ТЕГ-ын дарга асан хошууч генерал Б.Хурц өдийгөөс гурван жилийн өмнө хэд хэдэн ноцтой баримты дэлгэж байлаа. Тэрбээр “Хууль зүйн сайд Ц.Нямдорж гэдэг хүн сайд болох бүртээ энэ хэргийг шалгах ажлын хэсгийг өөрчилж, нийт дөрвөн удаа тараасан. Ажлын хэсэгт ажиллаж байсан 32 албан хаагчийг сольсон. Одоо дахиад (2017 онд) энэ хэрэг рүү орж байна. Аюулгүйн зөвлөлөөс гарсан зөвлөмжид энэ хэргийн ажлын хэсэгт мэргэжлийн алба хаагчид “Тогтвортой ажиллах ёстой” гэж заасан байдаг. Улс төрийн болон бусад зорилгоор Цэндийн Нямдорж энэ хэрэгт нөлөөлж байна.

Сайд болохоороо энэ хүн шууд Тагнуулын байгууллагаар оролдож эхэлдэг. Өөрөө биш ч хэн нэгнээр, өөр ямар нэгэн гишүүдээр хууль санаачлуулна, өргөн барина, энэ байгууллагын эрх мэдэл, бүх зүйл рүү халдаж эхэлдэг. Өөрөө хууль зөрчдөг” хэмээн С.Зоригийн хэрэгт түүнийг нөлөөлж байгаа талаар мэдэгдсэн. Мөн тэрбээр “Эрдэнэтийн асуудлаар Д.Дорлигжав 800 гаруй мянган ам.долларын асуудалд ороод, тэрийг энэ хүн сайд байхдаа бас хуулийн байгууллагад нөлөөлж, тэр хэрэг замхарсан. Дараа нь, Г.Алтангийн хэрэг байна. Бүхэл бүтэн байгууллагын материалыг шатаачихсан, эзэн холбогдогч нь тогтоогдохгүй хэргүүд байдаг.

Тухайн үеийн С.Энхтөр хурандаа “Өрөөндөө дуудаад дарамтлаад, энэ хэргийг хаа гээд байх юм” гээд ярьж байсан. Ц.Нямдорж өөрөө Эрдэнэтэд шахааны бизнестэй. С.Зоригийн хэрэг Эрдэнэтээс үүдэлтэй байх магадлал өндөр” хэмээн ярьсан байдаг. Мөн ТЕГ-ын дарга асан Б.Хурц хэвлэлд өгсөн ярилцлагадаа “С.Зоригийн хэргийн захиалагчийг хайх, илрүүлэх хэрэгт Ц.Нямдорж удаа дараа саад болж байна. Ц.Нямдоржийн ярьдаг хоёрхон сэдэв байдаг. Нэгдүгээрт, “Эрдэнэт” үйлдвэр, хоёрдугаарт, С.Зоригийн хэрэг. Энэ хоёр хэрэг хоорондоо холбоотой. С.Зоригийн хэрэг Эрдэнэтээс гаралтай. С.Зоригийн хэрэгт ял авсан этгээдүүд Эрдэнэтийнх.

Надад хардах асуудал их бий. С.Зоргийн хэрэгт Ц.Нямдоржийг шалгах ёстой. Яагаад энэ олон ажлын хэсгийг тараасан юм. Тэрбээр өөрөө энэ талаар хэлэхдээ “Миний гарын үсэг байхгүй “ гэдэг. Харин тэр нэг ч гарын үсэг зурахгүйгээр захирдаг хүн” гэсэн юм. Хошууч генарал Б.Хурцыг ийн мэдэгдсэнээс хойш гурван жил өнгөрчээ. С.Зоригийн хэрэгт Хууль зүйн сайд асан Ц.Нямдоржийг шалгана гэсэн юу болсон бэ.